Sakkortunerpaamik pineqaatissinneqarpoq
Pineqartumut tunngatillugu Danmarkimi suliassat annersaanni angut pineqaatissinneqarpoq.
- Ukiorpassuit matuma siornagulli katersukkakka nakkutigisinnaajunnaarakkit. Ingerlaaginnalerlutik. Unitsinneq sapilerakkit.
Århusimi eqqartuussivimmi ullumi taama nassuiaavoq 26-nik ukiulik Peter Christensen, ilanngullugulu oqaluttuaraa inuunermi affaani qanoq tiguartisimatiginini, tamatumammi kinguneranik meeqqat kinguaassiuutimikkut atornerlunneqartut assinginik katersisimasuni sakkortunerpaamik pineqaatissinneqarluni, ukiuni marlunni parnaarussassanngortitaagami.
Suliamut pineqartumut tunngatillugu Danmarkimi aatsaat taama annertutigisumik naammattoorsisoqarpoq.
Angutip internetikkut paasisaareernerata kingorna, angerlarsimaffiani februaarimi uppernarsaatissanik ujaasinermi, assit 4 millionit sinnillit videullu 15.000-it angutip qarasaasiaaniittut politiit nassaaraat.
Katersugaasa ilarpassui meeqqat kinguaassiuutimikkut atornerlunneqartut assinginik ingasattorujussuarnik ilaqartut oqaatigineqarpoq.
26-nik ukiullip katersinini 12-13-inik ukioqarlunili aallartippaa. Taamani niviarsiaqqanik ukioqatiminik kinguaassiuutitigut soqutigisaqarneq aallartippaa, tamatumali kingorna kingusinnerusukkut assinik assigisaanillu sualuttumik katerserusussuseqarnermik sunnigaasimalluni nassuiaavoq.
Angut tarnikkut katsorsarneqarnissamut naleqquttuusoq, pinerluttunik isumaginnittoqarfiup nalunaarutigereerpaa. Taamaattorli illersuisup sivikitsumik parnaarussivimmiittussanngortitsinerup katsorsarneqarnermik ilaqatinneqarnissaanik piumasaqaataa, eqqartuussisup itigartitsissutigaa.
