Sajuppillatitsilluni misissuinerit miluumasut sunnerpaat
Tamannalu Pinngortitaleriffiup isumaqatigaa. Ulluni makkunani sajupillatitsilluni misissuinerit Tunumi pileruttorput, nalunaarusiamilu atuarneqarsinnaavoq misissuinerit miluumasunut sunniisut.
Nipit sakkortuut 259 db-tut sakkortussusillit arfernik tusillatsitsilersinaasarput. Assersuutigalugu 259 db-p affaannaa inuit siutaannik anniartitsisarput.
Arferit nerisarnerat, nuliusarnerarlu aamma sunnerneqarsinnaasoq nalunaarusiami atuarneqarsinnaavoq. Allaat allaqqavoq ajornerpaaffinni arferit amerlassusaannut sunniutaasinnaasoq.
Miluumasut sajuppillatitsinermi misissuinerni sunnerneqartartut, Pinngortitaleriffiup isumaqatigaat. Kisianni arferit misissuisunut aatsaat qanippata sunnerneqassasut oqaatigalugu.
- Greenpeacekkut nalunaarusiaanni allaqqasut ilumoorput. Kisianni aatsaat arferit umiarsuarmut qanillippata ulorianassaaq, taamaammat arferit amerlanerit ajoqutigineq-ajorpaat, miluumasunut timmissanullu immikkoortortaqarfimmi pisortaq Fernando Ugarte taama oqarpoq.
Kalaallit Nunaanni sajuppillatitsilluni misissuiniaraanni malittarisassat sakkortuut malinneqassapput. Malittarisassat naalakkersuisut allagaraat, tassanilu allaqqavoq qanoq sajuppillatitsinerit avatangiisinut uumasunullu sunniuteqartarnersut.
- Greenpeacekkut nalunaarusiaanni allaqqasut tamarmik, naalakkersuisut nalunaarutaanni allaqqareerput. Nalungilarpulli qanoq misissuititsinerit ingerlanneqassanersut.
Naggataatigullu pinngotitaq uuliasiornermi aatsitassarsiornermilu akiliissuussasoq Fernando Ugartep oqaatigaa:
- Uuliasiorneq aatsitassasiornerlu aningaasarsiutiginiaraanni pinngortitaq eqqugaajuaannassaaq. Apeqqutaaginnarpoq pinngortitap qanoq eqqugaatiginissaa akueriumaneqarnersoq.