Saddam Husseinip toqutaanerani videoliortoq ujaaraat

Saddam Husseinip pillaatitut toqunneqarnerani oqarasuaammik angallattakkamik videuliorsimasoq tamatumalu kingorna internetikkut saqqummiisimasoq Irakimi naalakkersuisut suli ujaaraat.

Irakimi naalakkersuisut annilaanngatigaat assilisat sunni- aamma shiamuslimit akornanni akersuunnermik sakkortunerulersitsinissaat.

Filmiliarineqartumi aalaqqajuttumi takuneqarsinnaavoq Saddam Husseinip nikorfaffiata pisorpaloqisumik peerneqarnera timaatalu nakkarnera, asissuillunilu suaartarneq.

Videuliarineqartoq Kangiani Qiterlermi internetikkut oqarasuaatitigullu angallattakkatigut siaruartipallanneqarpoq.

Arabiamiut oqaaseqartartuisa pillaalluni toqutsineq, inatsisit malillugit pillaanertut pinnani quiassuaallunili toqutsinertut isigisariaqarnerusutut nalilerpaat.

Illoqarfimmi Saddamip inunngorfigisaani Tigrit-imi illoqarfinnilu allani sunnimuslimeqarfiunerusuni ullumikkut akerliussutsimik takutitsisoqartarpoq.

Tupernik nappaasoqartarsimavoq inuit Saddamimik naggataamik ataqqinninniarfigisinnaasaannik.

Aamma nunaannarmi illoqarfeeqqami ukiut sisamangajaat matuma siornagut Saddamip toqqorsimaffigisaatut nassaarineqarfiani, maarmorimik assilillugu inuusaliortoqarsimavoq.

Sunnimuslimit Saddamip kisermaassilluni naalakkersuisuunerata nalaani immikkut pitsaasumik pineqarsimasut aamma illersuinerminnik takutitsinaveersaartarsimagaluartut, videuliap saqqummiunneqarnerata kingorna sapiitsuliortutut isigisartik maannalu sunnimuslimitut upperisartik pillugu imminut pilliutigisutut isigisartik ataqqiniarlugu aqqusinertigut ingerlaarput.

Pillakkatut toqutsinerup kingorna imaluunniit videup saqqummiunneqarnerata kingorna manna tikillugu suli perulluliortoqanngitsoq oqaatigineqarpoq.