Saddam Husseinip angallatigisimasaa tuniniarneqalerpoq

Irakip præsidenterisimasaata Saddam Husseinip angallatigisimasaa nuannaariut, Irakimi naalakkersuisunit tuniniarneqalerpoq, Irakimi naalakkersuisut oqaaseqartittat ippassaq taamatut nalunaarpoq.
Allattoq Louise M. Kleemann
novembarip 03-at 2008 07:44

Saddam Husseinip angallatigisimasaa nuannaariut, Oceani Breeze ukioq 1981-imi Danmarkimi sananeqarpoq.

Angallat nuannaariut arlalillinik nalunnguartarfilersugaq, qinusarfilik, raket-inik igeriuttakkanik atortulersugaq, aqqartartuaqqamillu angallatiligaq, tuniniarneqarnissaa Irakimi nunanut allanut ministereqarfimmit isumaqatigineqassaaq.

Angallat nuannaariut, Frankrigip kujasinnerusortaani illoqarfiup Nicep umiarsualiviani novemberip qaammataanili talinngavoq, nutaarsiassaqartitsiviillu allaaserisaat aaallavigalugit, angallat taanna Saddam Husseinimut tunniunneqarsimanngissaannarpoq, taamaattumillu inatsisitigut kimit pigineqarnersoq isumaqatiginngiissutaasimalluni.

Angallat Irakimit pigineqarnera qulakkeerniarlugu, Irakip Parisimi aallartitaa juulip qaammataani Niceliarpoq, Irakimiullu erfalasuat angallammi amullulugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq