Saddam eqqartuussinermut ilaajumajunnaarpoq
Irakimi kisermaassilluni naalakkersuisuusimasup Saddam Husseinip eqqartuussaanini peqataaffigiumajunnaarpaa, ippassarlu ulluni 16-ini neriumajunnaaqqareerluni napparsimmavimmut unitsinneqartoq, nutaarsiassaqartitsivik Ritzau tusarliussivoq.
Taamaattorli Saddammimik eqqartuussineq unitsinneqanngilaq, ullumilu nanginneqarluni. Saddammip eqqartuussissuserisui Bagdadimi eqqartuussivimmi ullumi takussaanngillat, tamannalu pillugu eqqartuussisup Abdel Rahman-ip pisuutippai politikkikkut isiginnaartitsinerarlugit.
- Peqataamajunnaarneq eqqartuussinermut akornusersuiniarneruvoq malugeqqusaarnermillu pissuteqarluni, Abdel Rahman oqarpoq.
Saddammip arfarmik qatanngutaa Irakimilu isertorluni paasiniaasartuni pisortaasimasoq Barzan Al Tikriti, eqqartuussisunut aamma sassartinneqartoq illersuisussaminik tunineqaraluarami akuersiumanngilaq, parnaarussivimullu utertinneqarnissi kissaatigalugu, kissaataali eqqartuussisumit itigartinneqarpoq.
Saddam ulluni 16-ini neriumajunnaaqqareerluni napparsimmavimmut ippassaq unitsinneqartoq ajunngitsoq, eqqartuussivimmillu qaaqquneqaruni ornigulluarsinnaasoq, Bagdadimi eqqartuussiviup oqaaseqartitaa oqarpoq.
