Saattussanik pisassat amerlipput
Sinerissap ilaani saattuarniat naammagittaalliornerat pissutigalugu Naalakkersuisut ippassaq nakkaannarput Nuummit Paamiunut, Sisimiut eqqaanni Avanaanilu Qeqertarsuarmit Uummannamut saattussanik pisassat amerlineqarlutik.
Sisimiuni saattuarniat tamanna nuannaarutigaat pisassareriikkamik qaavatigut 200 tonsinik pisassinneqaramik. Saattuarniaq Hanseeraq Olsen isumaqarpoq taama pisassinneqarnertik saattussanut imatut nungusaataasutut oqaatigineqarsinnaagunanngitsoq Pinngortitalerfiullu saattuartassanik siunnersuuteqartarnini nalilersoqqittariaqaraluaraa.
Taamali isumaqanngilaq Saattuaq A/S-ip direktøria, Petrus Biilmann, akerlianillu oqarpoq biologit siunnersuutaat ataqqineqarnerusariaqartut.
Saattussanik pisassat amerlisarneqartariaqanngikkaluarput, Petrus Biilmann oqarpoq siunnersuutigaalu aalisartut marloqiusanik pisassaqartinneqartariaqaraluartut, tassa Pinngortitaleriffiup pisassatut siunnersuutai tunngavigalugit pisassaqartinneqariarlutik pisassatik taakku tamakkerunikkit qaleralinniarsinnaatitaallutilluunniit saarullinniarsinnaatitaasarlutik.
Taama aaqqiinikkut aalisartut aningaasartuuteqarnerulertariaqanngillat qassutitaaginnartariaqarmat ningittagartaarluniluunniit, Petrus Biilmann oqarpoq.
