Saattuat ataatsimiissutigineqaqattaarput

Saattuat qaammatit pingasut sinnerlugit aalisarunnaartinneqarnerat aalisartorpassuarnit naammagittaalliutigineqartoq, susassaqartunit assigiinngitsunit ataatsimiissutigineqaqattaarpoq.

- Naammagittaalliortorpassuit eqqarsaatigalugit, aalisartut ataatsimeeqatigineqarput, pinngortitaleriffillu. Taava aamma ippassaq aaliarsarneq pillugu siunnersuisooqatigiit pinngortitaleriffik peqatigalugu ataatsimeeqatigineqarpu.

Finn Karlsen aamma oqarpoq, saattuarniarnermik aalisarnerup unitsinnerata piffissaanut tunngatillugu, naaperiarfiusinnaasumik ujaasisoqassasoq. Aalisarneq pillugu siunnersuisooqatiigit 2004-mili siunnersuutigisaat aalajangerneqareersorlu imaaliallaannarlugu allanngortinneqarsinnannginnerarpaa aalisarnerlu pillugu siunnersuisooqatiigiit tusarniaaffigaaffigineqartut Finn Karlsen oqarpoq, nangillunilu:- Isumaqarpunga saattuarniartanerup qaammatini pingasuni uninngatinneqartarnissaa tasanngaannaq pinngikkaluarlugu piviusunngortinneqartariaqartoq. Ukiup ingerlanerani piffissami sivikinnerusuminngaanniit aallartinneqarsinnaavoq. Arlaatigut tassuuna naaperiartoqarsinnaassaaq, aammami iliuuseqartariaqaratta, Finn Karlsen oqarpoq nangillunilu:- Aalisartut assigiinngitsorujussuarnik isumaqarput, ilaat saattuat qaleruai aqilisimammata saattuanik aalisarunnaarsimapput, suliluunniit Naalakkersuisut saattuarniarunnaaqqusinerat pinngitsoq. Aalisartulli allamiittut oqalupput sattuat qaleruai suli aqileqqajanngitsut. Aalisartut tamarluinnarmik iluarisaannik iliuuseqarsinnaanngilagut, naapiffeqartariaqarpugulli, Finn Karlsen oqarpoq nangillunilu:

Taamaammat aalisarneq pillugu siunnersuisooqatiigiit ataatsimiisipparput, taakkualu siunnersuutissaat uagut tusassaqqaarlugu, uagut qanoq iliorsinnaanissarput paasinarsiumaarpoq. Ullup ingerlanerani aalisarnermut siunnersuisooqatigiit nalunaaruteqarnissaat utaqqiinnarparput. Finn Karlsen naggasiivoq.