Saattuarniarsinnaaneq ingerlaannarsinnaaneraraat

Sineriak tamakkerlugu saattuanik tunisinerup unitsinneqarnissaanik aalajangerneq allanngortissallugu tunngavissaqarluarpoq, taama illuatungeriit aappaat maanna nalunaarput.

Tunitsiviup Paamiut saattuat pisiarisimasaat tunisassiarisimasaallu Aalisarnermik nakkutilliisoqarfimmit misissorneqaqqammerput, Tunitsivimmi pisortaq Arvid Buhrkarl taama nalunaaruteqarpoq.

- Saattuat ajortortaqanngillat, arlaannaalluunniit aqitsumik qaleruaqanngilaq. Tunisinerup unitsinneqarnera taamaattumik kukkuneruvoq aningaasarsiornerlu sakkortuumik eqqorneqarpoq, Arvid Buhrkarl oqarpoq nangipporlu:

- Ukiup taamaalinerani saattuat amerikamut tunillugit iluanaarutigilluarsinnaagaluarpagut. Pitsaasunik saattuaanik pisaqarniarnissatsinnut tassa piffissanngorpoq. Saattuarniartut tunisassiorfillu saattuat qaleruaasa aqilinissaannut taamaalillutik eqqanaarsarsinnaapput. Eqqanaarsaqqusaanngilagulli, Arvid Buhrkarl oqarpoq.

Taanna allatuulli isumaqarpoq piffissami aalajangersimasumi saattuat tunineqarneri unitsinneqartariaqartut massakkulli Paamiut eqqaanni pigissaaqimmat unitsinneqartariaqanngikkaluartoq.