Saattuanik pisassiinerit amerlineqarput - ukioq-mannaannarli
Naak sinerissap qanittuani saattuarniat pisassaat annertusineqarnissaannut mianersoqqussutigineqaraluartoq, pisassiissutit Naalakkersuisut annertuseqqammerpaat.
Allattoq Mads Lynge
Sinerissap qanittuani saattuarniat pisassaat Naalakkersuisut annertuseqqammerpaat, Sisimiut avataanni 150 tonsinik, Nuup-Paamiullu avataanni 200 tonsinik.
Taamaalilluni ukiup sinneranut saattuarniarsinnaaneq naatsorsuutigineqarsinnaalerpoq.
Naalakkersuisoqarfimmiilli tusagassiuutinut nalunaarummi naqissuserneqarpoq Sisimiut avataanni 150 tonsinik pisassiineq ukioq-mannaannaq pisoq, taamaattumillu aappaagu taamaattoqaqqinnissaa ilimagisariaqanngitsoq. Tamaanimi annertunerusumik saattuarniarnissaq Pinngortitaleriffiup mianersoqqussutigaa, saatussat/assagiarsuit tamaaniittut nungukkiartuleriaannaammata.