Saassussisut iperagaapput

Angutit inuusuttut marluk, Nuummi angummik apriilip ulluisa 28-anni saassussisut, tigummigallagaanerat sivitsorneqassanersoq Nuup Eqqartuussiviani ullumi isumaqatigiinngissutaavoq.
maajip 27-at 2010 16:25

Saassussineq pivoq apriilip ulluisa 28-ianni, tassa Tussiarfissuup unnuaani, saassunneqartorlu illuanik tappingissanersoq suli nalunarpoq, saassunneqaramimi puiaasaaqqamik niaqqumigut milorneqarpoq.

Angutit taakku marluk tigummigallagaanerat sivitsorneqassanersoq ullumi naliliiffigineqarpoq. Unnerluussineq ataaseq unnerluussisussaatitaasut taamaatikkallarsimavaat, unnerluussaasup aappaa ukiukippallaarmat, aappaali suli unnerluussaammat tigummigallarneqarnissaa kissaatigalugu.

Taamaammat eqqartuussutip inernera unnerluussisussaatitaasut Kalaallit Nunaata Eqqartuussisuuneqarfianut suliareqqitassanngortippaat, aqagulu suliarineqassagunarpoq.

Unnerluussaq maanna iperagaagallarpoq, Nuummili Politeeqarfimmi vicepolitikommissæri, Morten Nielsen, oqarpoq, taamaattariaqanngikkaluartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq