Saarullittassiissutit 60 mio. koruuninik naleqarput
Tunisassiorfinnut paasiniaanitsinni erserpoq, saarulliup nerpia siatassiaq saarulliip 40 procentiata missaaniittartoq. Danskit aalisarnermut pisortaqarfiata nittartagaani 2007-imi akit nalunaarsorfianni erserpoq taakku nerpiit 60 mio. koruunit missaannik nalilerlugit nunanut allanut tunineqarsinnaasut, erseqqissaatigineqassaarli tunisassiornermi aningaasartuutit uani ilanngaatigineqanngimmata.
Aalisarnermut inatsimmi 1996-imeersumi allaqqavoq pisassinneqartut tassaasut angallatit Kalaallit Nunaanni angerlarsimaffeqartutut nalunaarsukkat.
Pisassiinermi aalisartitseqatigiittut imminnut taasut sulili angallateqanngitsut immikkut tamarmik 1.000 tonsinik pisassinneqarput. Assersuutigalugu taaneqarsinnaavoq Royal Greenland 600 tonsinik pisassinneqartoq.