Saarullittasseeqqinnikkut juulli ernumanarunnaarpoq
- Immikkut saarullittassiisoqarnera nuannaarutigeqaarput. Taama immikkut pisassiisoqarnerata kinguneranik Nanortalimmi aalisakkerivimmi sulisut 40-t missaanniittut juullip tungaanut suliinnarsinnaanerat qulakkeerneqarpoq. Inunnut ataasiakkaanut suliffissaqarneq taamalu imminut pilersorsinnaaneq pitsaasuuvoq, suliffissallu inuiaqatigiinni pissutsinut assigiinngitsunut pitsaasumik aamma sunniuteqartarput.
Kommune Kujallermi inuussutissarsiornermut suliffissaqartitsinermullu ataatsimiititaliap siulittaasua, Kalistat Lund tusagassiuutinut nalunaarummini taama allappoq.
Ataatsimiititaliap aamma taamaalilluni Naalakkersuisuni ilaasortaq Ane Hansen aamma Piniarnermut Aalisarnermullu Naalakkersuisoqarfik sukkasuumik suleriarnerat pillugu nersualaarpai.
Immikkut ittumik 250 tonsinik saarullittassiisoqarnera, Nanortalimmi Arctic Prime Productions-imi pisortap Marcus Jacobsenip soorunami aamma nuannaarutigaa.
- Immikkut pisassiisoqarnera soorunami naammagisimaaqaarput, taamaalillutami sulisuvut sulisoriinnarsinnaassagatsigik, tusagassiuutinut nalunaarummi pisortaq taama oqaropoq.