Saarulliit tunisat siorna ikileriarujussuarput
Tamanna Naatsorsueqqissaartarfiup kisitsisaataani nutaani takuneqarsinnaavoq.
Taamaallaat qaleralinnik saattuanillu tunisat amerleriarput aamma nalingi qaffariarlutik.
Taamaalilluni qaleralinnik tunisat 2008-mut sanilliullugit 6 procentimik amerleriarput. 2009-mi qaleralinnik tunisat katillugit 20.618 tonsiupput.
Aamma naak raajat tunisat ikileriaraluartut, raajat tunisat nalingi qaffariarput.
2009-mi raajat tunisat 62.566 tonsiupput, taakkulu ukiumut siulianut sanilliullugit 7 procentinik ikinnerupput.
Saarulliit tunisani allanngoriaateqarnerpaapput. Tunisat ukiuni kingullerni amerliartuinnaraluariarlutik siorna ikileriarujussuarput.
2009-mi saarulliit tunisat 7.790 tonsiupput taakkulu 2008-mi tunisanit 36 procentinik ikileriaateqarlutik.
Kisitsisit saqqummersitami 'Aalisarneq piniarnerlu 2009'-mi Naatsorsueqqissaartarfiup nittartagaani saqqummiunneqaqqammersumi atuarneqarsinnaapput.