Saaniluit qaqutigoornerpaat ilaat nungutaanngujoortut

Saaniluup uumasuusivissuarmiittup toqunerata kingorna saaniloqatigiinni taakkunani ilisimaneqartut pingasuinnanngorput.

Saanilussuaq aqitsumik qalerualik Yangtzemik taaguutilik Suzhouip Uumasuusivissuani arfininngormat toquvoq, aviisi ullormut saqqummersartoq Suzhou taama allaaserisaqarpoq.

Saaniluk arnaviaq saniluup angutivissap uumasuusivissuarmi aamma tassaniittup anisuuaanik ikkussiffiginiarneqarnermi aqaguani toquvoq.

- Angutiviaq pineqartoq 100-t sinnerlugit ukioqarsorineqarpoq, aviisi taama allaaserisaqarpoq.

Uumasuusivissuarmi sulisut saaniluit nungutaannginnissaat anguniarlugu saaniluit nuliartillugit ukiuni arlalinni piaqqitinniarsarigaluarpaat.

Saaniluup toqqutigisaa paasiniarlugu sukumiisumik maanna misissuisoqartussanngorpoq.

Saaniluup angutivissap Suzhouip Uumasuusivissuani pigineqartup saniatigut saaniloqatigiinnit taakkunaneersut marluinnaat ilisimaneqarput. Taakku Vietnamimi uumasuupput. Arnaviaanersut angutiviaanersulluunniit ilisimaneqanngilaq.

Saanilussuaq aqitsumik qalerualik Yangtze saaniluit imermiut anginersaraat. Meterimik takissuseqalersinnaavoq 100 kiilunillu oqimaassuseqalersinnaalluni.

Saaniluit taakku kuussuarmi Yangtzemi nunallu kuuini allani uumasuupput.

Saaniluilli ukiuni hunnorujulinni arlalinni piniagaanerat, mingutsitsinerup annertusiartuinnera, imaatigut angallannerup annertusiartornera pinngortitamilu ataqatigiinnerit sapusiarsuarnit akornusersorneqarneri pissutigalugit uumaniarnermikkut ajornartorsiortinneqarput.