SIUNNERSUUT: Saammaasseqatigiinnissamut isumalioqatigiissitaq Ataatsimoornissamut isumalioqatigiissitanngortinneqarli
Kalaallit Nunaanni saammaasseqatigiinnissamik oqallinneq naammanngilaq. Taarsiullugu Saammaasseqatigiinnissamut isumalioqatigiissitaliaq Namminersorlutik Oqartussanit pilersinneqartoq ataatsimoornissamut tunngassuteqalersillugu allanngortinneqartariaqarpoq - Danmark peqatigalugu. Pisortaanerusimasoq Michael Binzer aamma Naalagaaffeqatigiit pillugit peqatigiiffiup siulittaasua Nauja Lynge taama siunnersuuteqarput.
Siunnersuuteqartut isumaqarput maanna isumalioqatigiissitaasoq allanngortinneqassasoq, nunatsinni innuttaasunik katersuutsitsinissamut aammalu Danmarkimut atassuteqarnerup nukittorsarneqarnissaannut suut aqqutigineqarsinnaanersut sammineqarlutik.
Tulleriiaarinerup allanngortinnissaanik siunnersuuteqarpugut, aallaqqaasiutitullu ima oqartoqarnissaa kissaatigalutigu: Suut naapeqatigiissutigisinnaavagut? Taamaalioruttami ingerlariaqqinnissatsinnut toqqammavissatsinnik nassaarsinnaavugut, Nauja Lynge KNR-imut taama oqarpoq.
Namminiilivinnissaq kinguarsarniarneqanngilaq
Taamatut siunnersuuteqarneq Kalaallit Nunaata namminiilivinnissamut ingerlaarneranik kinguarsaaniarnerunngitsoq Nauja Lyngep erseqqissaatigaa. Ataatsimoornissamulli isumalioqatigiissitap inuiaqatigiinni nammineq naleqassutsimik misigisimanerup nukittorsarnissaanut aammalu Danmarkip naligiinnerusumik atassuteqarfiginissaanut atorneqassaaq.
- Danmarkip Kalaallit Nunaatalu akornanni naligiippallaanngitsumik atassuteqartoqarsimanera oqaatigineqarsinnaavoq. Nunatsinnilu nammineq naleqassutsimik misigisimaneq pitsaavallaanngilaq, isumaqarpugullu isumalioqatigiissitap tamanna akueralugu sulissutigisariaqaraa, Nauja Lynge oqarpoq.
Oqaaseq 'saammaasseqatigiinnissaq' ullutsinni atorneqaraangat nunasiaataanerup nalaani pisimasut pillugit ilungersunartut eqqaaqqajaaneqartarput - tamannalu kinguneqartussamik angusaqarfiusinnaanngilaq, Nauja Lynge isumaqarpoq.
- Iliuuserisimasat kanngusunnerlu toqqammavigalugit saammaasseqatigiinnissaq anguneqarsinnaanngilaq. Saammaasseqatigiinnissarli ataatsimoornikkut anguniarneqarsinnaavoq.
Christiansborgimi politikerinit taperserneqarpoq
Danmarkip Saammaasseqatigiinnissamut isumalioqatigiissitamut pisortatigoortumik peqataanissaa ministeriunerup Helle Thorning-Schmidtip (S) erseqqissumik itigartissimagaluaraa, parteeqataata Folketingip siulittaasuata Mogens Lykketoftip ataatsimoornissamik oqallittoqarnissaa isumassarsiatut pitsaasutut isigaa:
- Naalagaaffeqatigiinnerup tamatsinnut qanoq naleqartiginera eqqartussallugu immaqa tulluarpoq, ilanngullugulu erseqqissarpaa siunnersuut namminernersornerup eqqunneqarneranut uiggiutissallugu aamma tulluartoq:
- Ukiuni qulikkuutaani amerlasuuni tullerni naalagaaffeqatigiissagutta, taava naligiittutut ilumut misigisimanissarput qulakkeertariaqarparput, Mogens Lykketoft oqarpoq.
Dansk Folkepartiip Kalaallit Nunaannut tunngasunut oqaaseqartartuata Søren Espersenip Ataatsimoornissamut isumalioqatigiissitaliornissamik isumassarsiaq orniginartippaa:
- Isumassarsiaq pitsassuartut isigaara. Nuannaajallaatigeqaara. Tamannamiuna pisariaqartikkipput. Atorunnaarsitsinissamut aaqqissuussamik Saammaasseqatigiinnissamut isumalioqatigiissitatut ittumik pisariaqartitsinngilagut. Tassunga taarsiullugu Naalagaaffeqatigiinnerup qanoq ilillugu nukittorsarnissaa misissortariaqarparput. Tamannami uagut (Dansk Folkeparti, aaqq.) kissaatigiuaannarsimavarput, KNR-imut taama oqarpoq.
