Saamit taaseqataasalerusupput
Saamit siunnersuisoqatigiivisa, sulissutigisaraat Saamit Sverigemiittut, Finlandimiittut Ruslandimiittullu, pisinnaatitaaffii nukittorsassallugit. Saamit siunnersuisoqatigiivi, toqqaannartumik Issittumi Siunnersuisoqatigiinnut ilaasortaapput, soorlu nunatsinni aamma ICC ilaasortaasoq. Naak Issittumi siunnersuisoqatigiinnut toqqaannartumik ilaasortaagaluarlutik, aalajangiisoqassatillugu taasisinnaatitaanngillat atsioqataasinnaannatillu.
Saamit siunnersuisoqatigiivini ilaasortaasoq, maannalu Issittup siunnersuisoqatigiivisa Nuummi ataatsimiinneranni peqataasoq Gunn-Britt Retter, anguniagartik pillugu ima oqarpoq.
- Issittumi Siunnersuisoqatigiit, aatsaat siullermik isumaqatigiissummik atsioqatigiilerput. Uagut Saaminiit angorusupparput, kattuffiit aamma isumaqatigiissutinut atsioqataasinnaanngornissaat, taamaalilluni Kattuffiit malunnaateqarnerulissammata, Gunn-Britt Retter oqarpoq.
Kalaallit Nunaat, Namminersulernikuusoq maligassatsialaasoq aammattaaq oqaatigaa.
- Kalaallit Nunaat, siuttuusoq namminersorneralu nukittuujusoq, qiviartuaannarsinnaavarput. Uagut suli namminersunngilagut. Norgemi, Finlandimi Sverigemilu Same-tingeqarpugut, Nunatsinni assigiinngitsuni naalakkersuisunut siunnersortitut inissisimasunik. Kisianni nukittunerusumik namminersornertut ittumik aaqqissuussinissarput eqqarsaatigalugu, nikeriaqqinnissatsinni Kalaallit Nunaat qanoq iliorsimanersoq misissortuaannarparput, Gunn-Britt Retter oqarpoq.
Saamit siunnersuisoqatigiivisa Saamit namminneq nunaminni pisinnaatitaaffii pitsaanerulissasut anguniartuarpaat. Anguniagaqarneq ajornaatsuinnaanngitsoq, aammattaaq oqaatigaa.
- Ukiorpassuarni maannakkumut ajornartorsiutit annersaat tassaavoq, nunamut immamullu periarfissaqannginneq. Uagut aalisarfinnukarsinnaanatalu piniarfinnukarsinnaanngilagut, aammali immami pisuussutinut, tassalu aalisakkanut, pisinnaatitaaffeqanngilagut. Norgemi oqartussat aalajangeeqqammerput, saamit immami pisuussutinut oqaluttuarisaanikkut angusanik pisinnaatitaaffeqanngitsugut. Tassalu nunamut imermullu pisinnaatitaaffeqarnissatsinnik sorsuutiginneqaaagut, Gunn-Britt Retter oqarpoq.
