Saamerliuniat partiiat nutaaq pilersinneqarpoq
Partii Inuit, nunatsinni politikkip iluani nutaajusoq, pilersitsiniviusumik ippassaq ataatsimeersuarpoq. Partii Inuit politikkikkut IA-p saamiatungaani inissisimavoq, immaqalu qinersisartunik IA-p talerpimmut saqissimaneranik isumaqatigisaqanngitsunik qeqqasiortuuvallaarneranillu isumaqartunik imaluunniit qinersisartut inuusunnersaannit partiitoqqanik qinersisartuunngitsut imaluunniit ataqqisaqanngitsut ilaannik pissarsisinnaassaaq.
Allattoq Peter Troelsen, Simon Uldum
januaarip 25-at 2013 11:17
Partii qangali aallartinniarneqalerpoq, ilaatigullu tulliani Inatsisartunut qinersisoqalerpat partiip qinigassanngortitsinissaanut atsiornernik katersinermut atatillugu annertuunik ajornartorsiortoqarsimalluni. Partiili maanna piviusunngorpoq, siulersuinillu toqqaasoqarsimalerluni.
Partiimik pilersitsisoq, Nikku Olsen, siulittasutut toqqarneqarpoq, siulittaasup tulliatut toqqarneqarpoq Mette Lynge siulittaasullu tulliata aappaatut Randi Broberg toqqarneqarluni. Siulersuisunut ilaasortat sinneri tassaapput Jens Peter Lange, Frederik Lange, Peter Christensen aamma Poul Erik Egede. Georg Olsen siulersuisunut sinniisussatut toqqarneqarpoq.
