Saaffiginnittarfik "Kisimiinngilatit" unippoq

Peqatigiiffik Kisimiinngilatit, annermik telefonikkut siunnersuinermik ingerlatsisoq unippoq, taama nalunaarput peqatigiiffiup siulersuisui sinnerlugit aningaaserisoq ukiorpassuarnilu oqaloqatiginnittartuusoq Atsa Schmidt.
Allattoq Najaaraq Egede
apriilip 07-at 2009 08:12

- Siullermik ataatsimeersuartitseriartarnigut inussiffigineq ajoratsigit aammalu ukiorpanni oqaloqatiginnittartutoqarput ingerlaqqissinnaajunnaarluni nalunaarmat, peqatigiiffik ingerlaqqissinnaajunnaartoq aalajangerpugut, oqarpoq.

Ataatsimeersuarneq siulleq marsip ulluisa 13-ianni Blok 6-imi tullialu marsip ulluisa 25-anni Katersortarfimmi ingerlateriarneqarput, takkuttoqanngimmatali peqatigiiffik ingerlateqqinniarnagu aalajangerneqarpoq.

Kisimiinngilatit 1990-imi suleqatigiilerput, 1993-imi oqaloqatiginnittartortaarlutik 1995-imilu peqatigiiffinngorlutik. Ataatsimeersuartitsinerni takkuttukikkaangat siulersuisut sinniisoqarnatilluunniit ingerlaqqittarput.

-Tamaviaarnarsimaqaaq, inummullu assoroornaqaluni, Atsa Schmidt nassuiaavoq.

Peqatigiiffik Kisimiinngilatit bingortitsisarnermigut telefonit ulloq unnuarlu ammatinnerat akilersorpai.

- 2008-milu inuit 358-it, pingaartumik unnuakkut sinarnussimapput. Sianertullu tassaasinnaasarput imminornissamik eqqarsaateqartut, atornerlunneqarnikut, aappariinnerliortut imaluunniit allarluinnarmik ajornartorsiuteqartut, Atsa Schmidt nassuiaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq