Saaffiginnittarfeqarnissaq pillugu misissuisoqarpoq
Inuit pisinnaatitaaffii pillugit Katuami ataasinngormat tusarniaatitsisoqarmat Nunatsinni saaffiginnittarfeqalernissaq ilaatigut ujartorneqarpoq.
Inuit pisinnaatitaaffii pillugit Danmarkimi ilisimatusarfik naalagaaffeqatigiinnerup iluani kisiartaalluni inuit pisinnaatitaaffiinik suliaqartartuuvoq, Inuillu Issittormiut Siunnersuisoqatigiiffiat ICC tamanna naammaginngilaa, Nunatsinni saaffiginnittarfeqalernissamik Kattuffik Ataatap siunnersuutaa taperserlugu.
Kattuffik Ataatap siulittaasuata Tida Ravnip tusarniaanermi siunnersuutigaa Nunatsinni saaffiginnittarfeqalissasoq, Danmarkimi ilisimatusarfik Nunatsinnut tunngassuteqartunik sullissinnginnera ilaatigut oqaatigalugu.
Inuilli pisinnaatitaaffii pillugit Danmarkimi ilisimatusarfiup Kattuffik Ataata illuatungilerpaa:
- Inuit pisinnaatitaaffii pillugit Danmarkimi ilisimatusarfik Kalaallit Nunaannut tunngassuteqartunik suliaqarnissamik piginnaatitaaffeqarpoq, Mie Roesdahl, Danmarkimi ilisimatusarfimmi immikkoortortaqarfimmi pisortaq oqarpoq.
Inuilli pisinnaatitaaffii pillugit Kalaallit Nunaanni saaffiginnittarfeqalernissaq taassuma tapersersorpaa:
- Kalaallit Nunaanni saaffiginnittarfeqalerpat pisariinnerujussuanngussaaq, suliassat Kalaallit Nunaanniilissagaluarmata, qaninnerullutik, inatsisilerinerlu pisariinnerulissalluni, Mie Roesdahl oqarpoq.
Inuit pisinnaatitaaffii pillugit Nunatsinni ilisimatusarfeqalernissamik periarfissat misissorneqarnissaat, Inatsisartut 2008-mi akuersissutigaat, suliarlu sumut killippa?
- Inuit pisinnaatitaaffii pillugit Danmarkimi ilisimatusarfik ataatsimeeqatigineqareerpoq, Inatsiseqarnermillu aqutsisoqarfik Nunanullu Allanut naalakkersuisoqarfik periarfissat misissuiffigileruttorpaat, Johan E. Sørensen, Naalakkersuisut siulittaasuata allattoqarfianeersoq oqarpoq.
Inuilli pisinnaatitaaffii pillugit Kalaallit Nunaanni ilisimatusarfeqalissanersoq nalunarallarpoq, suliarlu qaammatini arfinilinni suli ingerlasinnaassasoq Johan E. Sørensen oqarpoq, qinikkallu kingorna aalajangiisussaallutik.
