S akerleralugu S: "Tupannarpoq akuerineqarsinnaanngilluinnarlunilu"

Qeqqata Kommuniani Siumut sinnerlugu borgmesteri Hermann Berthelsen - SIK GA-lu - peqatigalugit, Alcoamik piginnittuussutsit qanoq innissaat piaartumik nalunaarutigeqqullugit piumasaqarput. Allagaqaatip imarisai Siumukkormiumut allamut Karl Lyberthimut tupaallatsitsivoq, taamaammat tusagassiuutitigut nalunaarut tunuartittariaqartoq oqaatigaa.
maajip 22-at 2011 15:59

Qeqqata Kommuniani Siumut sinnerlugu borgmesterip tullia siulleq, Karl Lyberth, borgmesterip Hermann Berthelsenip GA SIK-lu peqatigalugit tusagassiutitigut Alcoa pillugu nalunaarutaanut sakkortuumik assuarinnilluni tusagassiuutinut allagaqarpoq.

Qeqqata Kommuniani borgmesteri Hermann Berthelsen SIK GA-lu, peqatigalugit tusagassiutinut maajip 18-iani allagaqaateqarput, alumiiniummimik aatsitsiviliorniarnerup piginneqataassutigineqarnissaa pillugu aalajangiisoqartariaqalersoq. Taamaammat Kalaallit Nunaat, Alcoamut piginneqataassuteqassappat, Alcoa nukinnik atuiffigineqartariaqanngitsoq tusagassiutinut nalunaarumminni allallugu.  Tamanna pillugu Karl Lyberth ima qisuariarpoq:

- Taamatut nalunaaruteqarneq kommunalbestyrelsemi oqaluuserineqarnikuunngilaq akuerineqarnikuunanilu. Maniitsoq sinnerlugu kommunalbestyrelsimut ilaasortaalluni borgmesteritta kommuni sinnerlugu taamatut kusanaatsigisumik eqqunngitsigisumillu avammut oqariartuuteqarnera akuerineqarsinnaanngilluinnarpoq.

Karl Lyberthip ilanngullugu oqaatigaa, piffissanngortoq Qeqqata kommuniani borgmesterip Hermann Berthelsenip Maniitsoq nunarfiillu ilanngullugit pimoorussilluni ilanngullugit sullisissagai, Sisimiut kisiinnangajaat aallukkunnaarlugu.

- Maniitsormiuulluni tupannarpoq akuerineqarsinnaanngilluinnarlunilu Qeqqata Kommunia sinnerlugu borgmesterip Hermann Berthelsenip tusagassiutinut taamak nalunaaruteqarnera.

Taamaammat Karl Lyberthip Borgmester Hermann Berthelsenip Qeqqata kommunia sinnerlugu Alcoa pillugu tusagassiuutitigut nalunaarutini utertittariaqaraa, allakkamini ersersippaa.