Timmisartuaqqat inuttaqanngitsut iluliarsuarnilu GPS-it Sullualummi isumannaannerulersitsissasut

Sullualuk aqqutigalugu qaninnersiorniarneq Europap Asiallu akornanni umiarsuakkut assartuinermi aningaasarpassuarnik ullunillu sipaaruteqarfiusinnaavoq.

Naalli kianneruleriartornerata kingunerisaanik Canadap avannaata imartaa ukiumut qaammatit sisamat missaat aqqutigineqarsinnaasaleraluartoq, imaatigut angallanneq iluliarsuit pillugit suli ulorianarpoq.

Ilisimatuulli Syddansk Universitetimeersut (SDU) misissuleruttukkaminik ajornartorsiutaasumut aaqqiissuteqarsinnaagunarput.

Assi © : KNR/Anton Gundersen Lihn

2017-imi misissuinerup iluliat 400-it Sullualummiittut takutippaa. Tamanna containerinut umiarsuarnut angisuunut Europap Asiallu akornanni sukkanerusumik angalaniartunut navianartumik unammillernartoqartitsivoq. Assiliartalernera: Anton Gundersen Lihn

SDU-mi timmisartuaqqanik inuttaqanngitsunik suliaqarfimmit, suliniummit Artdronemit adjunktip, Agus Ismail Hasanip timmisartuaqqat inuttaqanngitsut Sullualummut gps atorlugu iluliarsuarnik sumiissusiliisikkiartorlugillu assiliitikkiartorniarpai.

- Paasissutissat taakku ilulissanik erseqqissaanermut taakkulu ingerlaarnerannut ilisimannilernermut atorsinnaavagut.

- Ilulissat ullormiit ullormut nikissinnaasarput. Taamaammat timmisartuaqqat inuttaqanngitsut umiarsuarniissapput ullormullu ataaseriarluni aallartinneqartassallutik, Agus Ismail Hasan oqarpoq.

Nassiussisartut piffissamik aningaasanillu sipaaruteqarsinnaasut

Suliffeqarfiit nassiussuisartut paasissutissanik atuisinnaanissaat piffissamillu sipaaruteqarsinnaanissaat siunertaavoq.

- Suliffeqarfiit erseqqissaassuteqarnerit angallavissaminnik pilersaarusiorluarnissaminnut atorsinnaavaat. Assersuutigalugu 2017-imi Sullualuk tamangajammik iluliaqarpoq, tamannalu kinguaattoortitsivoq. Uagulli erseqqissaassuteqarnerput atorlugu aqqut pitsaanerusoq nassaarineqarsinnaassaaq umiarsuillu Sullualukkoornerannut aqqutissiuutaasinnaalluni, Agus Ismail Hasan oqarpoq.

Timmisartuaqqat inuttaqanngitsut assiliissutit infrarødeusut atorlugit assiliisinnaapput, taamaalilluni ilulissat ilaat immap ataaniittoq aamma takuneqarsinnaalluni.

Assi © : KNR/Anton Gundersen Lihn

SDU-mi Dronecenterimit, Adjunktip, Agus Ismail Hasanip Sullualummi iluliat sumiissusersineqarsinnaalersinniarpai. Taassuma suliniutip timmisartuaqqanik inuttaqanngitsunik ilulianut GPS-ilersuinikkut allilerneqarnissaa neriuutigaa, taamaalilluni iluliat malinnaaviuarneqarsinnaassallutik. Assiliartalersornera: Anton Gundersen Lihn

Agus Ismail Hasanip ilulianik nakkutiginninnerullualernissaq siunertaralugu suliniutip annertusinissaa neriuutigaa.

Ilulisst gps-ilersorneqarsinnaasut

Ilisimatuup timmisartuaqqat inuttaqanngitsut ilulianut GPS-imik nassitsisulersuinissaannut suliniutip nutaap EU-mit tapersiissuteqarfigineqarnissaanut qinnutigeqqammerpaa.

Ilisimatuut nassitsisunit paasissutissat atorlugit iluliat sumi inissisimanerat, tassungariartornerminnilu sumiissimanerat naatsorsorluarsinnaanerulissavaat.

- Taamaaliornikkut iluliat ullup tulliani sumi inissisimalernissaannut kisitsisitigut paasissutissiisinnaassaagut, Agus Ismael Hasan oqarpoq.

Agus Ismael Hasanip iluliat allanngoriartortuaannartut, aserortartut aattartullu sillimaffigaa. Taamaammat nassitsisut arlallit ilulianut ikkussorneqarnissaat pilersaarutaavoq.

Assi © : KNR/Anton Gundersen Lihn

Ilulianili GPS-imik nassitsisalersuinikkut ilisimatuut iluliat ullup tulliani sumiissinnaanerannut siumoortumik naatsorsuisinnaalissapput. Tamanna suliffeqarfinnut Sullualukkut angallassisartunut ingerlaarniarnissamut pilersaarusiartussanut periarfissiissaaq. Assitalersornera: Anton Gundersen Lihn

Teknologimili issittup silaata sakkortusinnaanera pillugu suli unammillernartoqarpoq. Kiassutsip nillertumiinnera pissutigalugu timmisartuaqqat inuttaqanngitsut bateerii nungupallattarput, sarfii serminittarput silalu ajortorujussuanngorsinnaalluni.

Batteerit ikummatissaliortunik taarserneqarsinnaasut

Ilisimatuulli suliniummut nutaamut, EU-mit tapiiffigineqartussatut neriuutigisaminnut aaqqiissutissaqalersinnaagunarput.

- Batteriinut tunngatillugu ajornartorsiuteqarnermi timmisartuaqqat inuttaqanngitsut ikummatissaliortunik atortulerlugit ingerlannissaannut DTU suleqatiginiarparput, Agus Ismail Hasan oqarpoq, nangillunilu:

- Norgemi suliffeqarfik timmisartuaqqat inuttaqanngitsut sikunnginnissaannut immikkut ittumik ilisimasaqartoq aamma suleqatigaarput.

Den Danske Maritime Fondip suliniutip Artdronep ilaa siulleq 175.000 koruuninik tapiissuteqarfigaa, ilisimatuullu suliniup ilaata tullianut EU-mik upernaamut tapiissuteqartoqarnissaa maanna neriuutigaat