Qassutinik atorunnaakkanik utertitsinissamut neqeroorut suli atorneqanngitsoq
Qassutitit pisoqqat utertikkukkit pinngortitarlu paaralugu. Taava qassutiseqqinnissannut tapisissaatit.
Nuummi, Ilulissani, Aasianni Sisimiunilu aalisartunut tamanna januaarip qiteqqunneraniilli neqeroorutaavoq.
Aalisartutta assersuutigalugu nipitsat arnarluinut qassutit 649 kronuunillit utertikkunikkit 100 koruuninnassutigissavaat.
Taamaakkaluartorli qassutinik maannamut suli utertitsisoqanngitsoq qassutaarniartup Qalut Voninip pisortaa, Cuno Jensen, oqarpoq.
Taassuma piffissami qanittumi utertitsisoqallattaalernissaa ilimagaa.
- Nipisaat arnarluinik apriilip aallartinnerani aatsaat aalisarfiulerpoq, aalisartullu amerlasuut qassuteqarput. Qassutinik nutaanik tunisaqalaarnikuuvugut, taava arnarlunniarneq naammasseriarpat qassutinik atornikunik tunniussisoqallattaalernissaa ilimagaarput, Cuno Jensen oqarpoq.
Qassutit 6000-it utertinneqarnissaat naatsorsuutigineqartoq
Qaasutinik atorunnaakkanik utertitsisinnaanermi pinngortitamik avatangiisinillu illersuineq siunertanut ilaavoq. Qassutit atorunnaakkat imaanut, qeqertamut, talittarfimmut allamulluunniit qimaannarneqartannginnissaat anguniarlugu Nuummi, Ilulissani, Sisimiuni Aasiannilu Qalut Vonininut utertitsisinnaanermik aaqqissuussipput.
Aalisakkammi qassutini qimaannakkani ipiinnarsinnaapput.
Tamanna pinngortitamut aalisartumut, niuertarfimmullu iluaqutitaqassasoq, pisortaq oqaluttuarpoq.
- Tassa kaaviaartinneqarsinnaagamik taakku qassutit. Assersuutigalugu qassutit atorunnaakkat uagutsinnut utertikkunikkit, taava qassutinik pisoqqanik kisianni nutartikkanik piseqqissinnaallutik. Taakkulu ukiuni marlunni pingasunilluunniit atoqqereerunikkit utertissavai, Cuno Jensen oqarpoq.
Qaammatillu pingajuata affaani utertitsisinnaanerup neqeroorutaanerani suli atorneqalingikkaluartoq, siunissami atorluarneqalerumaartoq pisortaq isumalluarpoq.
- Ukiumut qassutit 6.000-it utertinneqartarnissaat angorusupparput, kisianni ukioq manna tamatuma angunissaa qularaarput. Ungasinnerusorli qiviassagaanni, nunatsinni qassutit tunisartakkagut tamassuma missaanniipput. Neriuppugullu taakkua amerlanerpaartaat pissarsiarisinnaassallugit. Aamma uagutsinni pisiaasariaqanngillat, qassutit allamik pisiaagaluarpata aamma tigusinnaavagut, Qalut Voninip pisortaa, Cuno Jensen, KNR-imut taama oqarpoq.