Appaliarsuit anaat qorsooqqinnerulersitsisut

Tamannali Avannaani piniartunut nutaarsiassaangilalaq. Piniartoq 43-nik ukiulik Markus Hansen, sooq taama qorsooqqitsigisarnera pillugu aperineqarami, KNR-imut ima akivoq.

- Appaliarsuppassuit ineqarfigigamikku appaqarfiullunilu. Ilimagaara timmissat anaannit taamatut qorsooqqissasoq. Timmissat anaat peqqutaallutik, Savissivimmi piniartoq, Markus Hansen taama oqarpoq.

Aamma ilisimatuut danskit taama inerniliipput. Appaliarsuimmi 60 millionit New Foundlandimit Avannaanut aasaanerani piaqqiartortarput.

Appaliarsuppassuillu anaat nunammut qorsooqqitsitsisarput, uumasunullu, soorlu umimmannut, qeerlutuunut, tuttunut teriannianullu iluaqutaasarlutik.

Nunallu qorsooqqinnerata sunniutaasa ilai umimmanni takuneqarsinnaapput.

- Inga umimmaqarfik pituffiup eqqaaniittoq issuinnangajaagammat, umimmaat kukiffaat taakani tallisarput.

Appaliarsuilli anaat sooq qorsooqqitsitsisarnersut piniartup Markus Hansenip naluaa.

Ilisimatuulli tamanna tassa paasisivaat. Appaliarsuit piaqqiornerminni kingunnik inuussutissartaqarluartunik nerisaqartarput, kinguillu anarineqaraangata inuussutissartaat nunamut pisartut, Videnskab.dk allappoq.

Appaliarsuilli anaat aamma ajoqutaasarput. Tatsit kuullu appaliarsuit piaqqiorfiisa eqqaanniittut ananit seernarnerulersinneqartarput, uumasunik uumaffigineqarsinnaajunnaarlutik. Tatsip ataatsip seernassusaa misissorneqarmat pH-mik naleqassusaa 3,4-mut uuttortarneqarpoq, tassalu seernartorujussuulluni.