TELE-POST Immap naqqatigut kabelip ajoquteqalernera pillugu atuisut ilaat taarsiivigineqassapput
![](/sites/default/files/styles/image_934x467/public/article_images/kristian_reinert_davidsen_0.jpg?itok=SAbSeJCT)
Immap naqqatigut kabelip ajoquteqalernerata kingunerisaanik Tele-Postip pingaartumik avannaani sullissinera ajornartorsiorfiuvoq, sullitalli taarsiivigitissinnaanissaannut maannamut pissutissaqarsimanani.
Tele-Postimili aqutsisut immap naqqatigut kabelip ajoquteqalernera immikkut ittutut nalilerpaat:
Avannaani tassa Sisimiuniit Kullorsuaq tikillugu inuinnaat atuisut Tusassimik Interneteqarlutik qaammatikkaartumik pisartagaqartut, attaviit arriinnerini Tusass-imik Internetimut akiliutaasartoq annikinnerpaaq tassalu 499 koruunimik akiliisassasut, Tele-Postip pisortaanera Kristian Reinert Davidsen ilisimatitsivoq.
Qaammatillu marluk missaani imaatigut kabelip ajoquteqarneranik Internetikkut attaveqaatit sunnerneqassasut ilanngullugu pisortaaneq ilisimatitsivoq. Imaatigullu kabelip ajoqquteqarnerani suliffeqarfiit annikinnerpaamik eqqugaanissaat anguniarlugu atuisut inuinnaat internettimut attaveqaataat arriillineqarsimasoq ilanngullugu oqaatigaa.
Atuisut taarsiivigitinnerat januaarip 31-anni takuneqarsinnaanavianngilaq, piaarnerpaamilli takuneqarsinnaanissaa Tele-Postimit sulissutigineqartoq, Tele-Postip nalunaarutigaa.