QULAARPAA Imarsiortunngorniat ilinniarnertik aallulluarpaat
Nal. 13.16: Tunngaviusumik ilinniagaqarnernut tamanut Paamiunilu Imarsiornermik Ilinniarfimmi tunngaviusumik ilinniagaqarnermut tunngasunik grafinik marlunnik ilanngutassiaq ilallugu nutarterneqarpoq.
- Mumisitsivugut. Siusinnerusukkut 60-70 procentit unitsitsiinnartartut, maannakkut naammassisartut 60-70 procentiupput. Imarsiornermi Ilinniarfimmi pisortaq Jeppe Carstensen oqarpoq.
Paamiuni ilinniarfiup tunngaviusumik ilinniarfittaani ilinniartut unitsitsinnartartut ikilipput.
Kisianni inuussutissarsiutigiligassamik ilinniakkamik unitsitsiinnartarneq nunatsinni ajornartorsiutaagaluarpoq. 2012-imi ilinnialertut agguaqatigiissillugu 55 procentii unitsitsiinnartut, Naalakkersuisut ilinniartitaanermut pilersaarutaat II 2015-imeersumi takuneqarsinnaavoq.
Ilinniarfiit piumasaqaateqartariaqarput
Imarsiornermik ilinniarfimmi ilinnialertut 70 procentiisa missaat siusinnerusukkut unitsitsiinnartaraluarput, pissutsillu iliuuseqarfigineqartariaqarsimapput.
Grafip inuussutissarsiutinik ilinniarfinni ilinniakkamik unitsitsiinnartutut qanoq nikeriarsimanerisa takussutissaata ataani ilanngutassiaq nangeqqissaaq.
- Siullertut ilinniagakkamut qinnuteqartut akuerisagut ikinnerulersippagut, ilinniartullu ilinnialinnginneranni ilinniarnissamut qanoq kajumitsiginersut paasiniarlugit oqaloqatigeqqaartarpagut, Jeppe Carstensen oqarpoq.
Ilinniartut piumasaqaateqarfiginissaat pingaaruteqartoq, Jeppe Carstensen isumaqarpoq, taamaammat ilinniartut unitsitsiinnarnissamik eqqarsaateqartut ilinniarfimmi sulisunit oqaloqatiginiarneqartarput.
- Ilinniakkamit katataalersut unitsiinnarusuttulluunniit tusaraangatsigit toqqaannaq attaveqarfigisarpagut.
Misissuineq: Ilinniarfiit ilisimasaminnik avitseqatigiittassapput
Inuussutissarsiutissamik ilinniartut sooq unitsitsiinnartarnerannik misissuineq ukioq kingulleq saqqummiunneqarpoq.
Inuussutissarsiutissanik ilinniarfiit unitsitsiinnartut qanoq ikilisinneqarsinnaanerinik misilittakkaminnik avitseqatigiinneq ajortut, misissuinermi inerniliunneqarpoq.
Ilinniarfiilli ilisimasatik pillugit avitseqatigiittarnerat aallartereersoq pitsaanerulersinnaasorli, Jeppe Carstensen isumaqarpoq.
Imarsiornermi Ilinniarfimmi tunngaviusumik ilinniagaqarnermi ilinniakkamik unitsitsisarneq pillugu ilanngutassiaq grafip ataani nangeqqippoq.
Kilde: Søfartens Maritime Center
Kisianni immaqa ataatsimiittarnitsinni aaqqissuussaanerusumik oqaloqatigiissutigisarnissaanut pikkoruinnerusinnaavugut, Imarsiornermik Ilinniarfimmi pisortaq oqarpoq.
Ilinniartullu ilinniakkamik unitsitsiinnartarnerannut ataasiinnarmik peqquteqanngitsut misissuinermi takuneqarsinnaavoq.
Ilinniakkamik unitsitsiinnartarneq ataasiinnarmik peqquteqartarnera qaqutigoortuusoq, assigiinngitsorpassuarnillu peqquteqartartoq, misissuinermi inerniliunneqartoq takuneqarsinnaavoq.