Røde Korsip Somalia suli isumannaraa

- Tamanna immannguaannaq sunniuteqassaaq. Mogadishumi kvadratkilometerit arlaqanngitsut maanna ikiorserneqarsinnaalerput. Nunap kujasinnerusuani kaannersuaqarfiusunut apuussinnaanissarput pingaarneruvoq, Dansk Røde Korsip pisortaa Anders Ladekarl oqarpoq.

Nunap immikkoortuinut kaannersuaqarfiusunut Røde Kors isersinnaatitaavoq, taamaattorli Naalagaaffiit Peqatigiit tamaanga peqqusaanatik, tamannalu amigaataaqaaq, Anders Ladekarl oqarpoq.

- Somaliap kujasinnerusuani qiterpasissuanilu kaannersuaqarfinnut inunnut 150.000-inut qaammammi ataatsimi ikiorsiissutissanik agguaassinerput naammasseqqammerparput. Taamaattorli nunap ilaani tamaani ikiorserneqarnissaminnik pisariaqartitsisut 500.000-ingajannik amerlassuseqarput, tassa taamaalilluni Røde Korsip naammassisinnaasaanit annerujussuarmik ikiorneqarnissamik pisariaqartitsisoqarluni, Anders Ladekarl DR-imi nutaarsiassaqartitsivimmut oqarpoq.

Aamma naak ingasattajaarniat al-Shabaab-ikkut akornusersuiunnaaraluartut ikiorsiissutissat apuunniarnerat qulakkeerneqarsinnaanngilaq.

- Soorlu lastbilit pingasut ikiorsiissutissanik ulikkaarlugit usilersoneqarsimasut kingullermik ippassaq tillinniarfigineqarput, al-Shabaabikkunniunngitsoq, naalakkersuisulli sakkutuuinit tillinniarfigineqarlutik, tassa taamaalilluni Somaliami ikiorsiissutinik apuussiniarneq ajornakusoortorujussuuvoq, Anders Ladekarl naggasiivoq.