Kalaallit Nunaat pillugu akerleriinnermi Danmark USA-p præsidentianit Donald Trumpimit tatineqangaarpoq.

Danmarkilli USA-llu akornanni Natop qullersaqarfiani sisamanngornermi ataatsimiinnermi pissutsit ajornerulerumaarnissai Natop qullersaata Mark Ruttep naatsorsuutiginngilaa.

Killormut Arctic Sentrymik suliaqarneq Issittoq pillugu nutaamik katersuutsitsisoq, Mark Rutte ataatsimiigiarnermini oqarpoq.

- Issittumi navianartoqarneranik nalilersuineq oqaloqatigiissutiginiarlugu iligiittut katersuuppugut. Kalaallit Nunaat aammali Issittoq tamaat pineqarpoq, taamaattumik aamma Sverigemit Finlandimillu ilivut, Issittumi misilittakkaminnik tunniussaqangaartuusut, ilaapput.

- Taamaattumik sumiiffiup illersornissaanut piginnaasaqarpugut. Arctic Sentry aqqutigalugu Ruslandip Kinallu Issittumut isersinnaannginnissaat qulakkeerparput, Mark Rutte oqarpoq.

Schweizimi illoqarfimmi Davosimi ataatsimiinnermi pingaarutilimmi Issittup illersornissaa Amerikamiut Kalaallit Nunaannik piginnittuunissaannit pingaarnerutinneqassasoq, Ruttep Trump isumaqatigaa.

Taamanimiilli USA-p Arctic Sentry tapersersorpaa, taamaalillunilu tamanna Trumpip nunap immikkoortuani isumannaallisaanermut ernumassutaanut akissutissatut isigineqarsinnaavoq.

Natomit tusarliinerit naapertorlugit Rusland Kinalu tassani sakkutooqarnerulerput. Rusland eqqarsaatigalugu sakkutooqarfiliinikkut aqqartartuliinikkullu tamanna pivoq, Natomillu tusarliisoq qaffasissumik inissisimaffilik naapertorlugu Kina "misissueqqissaartartunik aallartitsivoq", tamannalu sakkutuut isertortumik paasiniaanerannik isertuussinerusinnaavoq.

Namminneq pillutik akisussaaffeqarnerulissasut

USA-li qanoq atsigisumik Arctic Sentrymut peqataassanersoq suli nalunarpoq.

Europap isumannaallisaanermut akisussaaffeqarnerulernissaanik kissaateqarnermik Trumpip aqutsisui arlaleriarlutik oqariartuuteqarput.

Tamanna Europamik, Ukrainemik Issittumillu illersuinermut tunngavoq.

USA-p Natomiiginnarnissaa Trumpip erseqqissarpaa,  Natomiliillersornissamut ministerit sisamanngornermi  ataatsimiinneranni USA-p illersornissamut ministeria, Pete Hegseth, peqataassanngilaq.

Tamanna USA-p Natomi ilaasortaajunnaanngikkaluarluni pingaartitsinnginneranut ersiutaasinnaavoq. Taamaattumik USA appasinnerusumik inissisimasumik sinniisoqarpoq, tassami illersornissamut ministerip tullia, Elbridge Colby, sisamanngornermi ataatsimiinnermut peqataassammat.

Mark Ruttep Amerikamiut pingaarnersiueriaasiat paasilluarnerarpaa.

- Pete Hegseth, USA-p præsidentia Trumpillu pisortaqarfiani qaffasissumik inissisimaffillit attaveqarfigiuarpakka.

- USA-lli nunarsuaq tamaat isumagaa. Nato pingaaruteqarpoq, aammali Manerassuaq pingaaruteqarpoq, taamaattumik sooq taama pingaarnersiuisoqarnersoq paasisinnaavara, Mark Rutte oqarpoq.

/ritzau/