Ruthip kalaallisut oqaatsit ataqqineroqquai

Ullumi ulloq februaarip 21-at UNESCOp nunani tamalaani ilitsoqqussaralugu oqaatsinut ullorititaraa.

Ulloq Nuummi Ilimmarfimmi Oqaasileriffimmit oqalugiartitsinikkut aliikkusersuinermillu malunnartinniarneqassaaq.

Ukiormanna qulequtaq pingaarneq tassaavoq: "Oqaatsit illersorniarlugit, siuarsarniarlugit, aamma assigiinngisitaartuunerat ataavartinniarlugu paasissutissiinermut attaveqaqatigiinnermullu atortorissaarutit".

Ruth Heilmannip tikkuarpaa, Naalakkersuisoqarfinnut assigiinngitsunut apeqquteqarnerni, apeqqutinik akissuteqarnerni, ataatsimeersuarnernilu ilanngussinerni arlaleriarluni kalaallisut allagaqarnissamik piumasaqaateqarani qallunaatut allagaqarnissamik piumasaqaateqartoqartartoq.

- Tamanna eqqumiiginarpoq, tassami Namminersornerup 2009-mi eqqunneqarnerani oqaatsivut Nunatsinni pisortatigoortumik oqaasiulermata, Ruth Heilmann allappoq.

Taassuma tamatumunnga peqatigitillugu taavaa, Namminersorlutik Oqartussat, Qeqertarsuatsiaani rubini pillugu nunaqqatigiinnut februaarip aqqarnanni paasisitsiniaanerat nutserisoqarani qallunaatuinnaq ingerlanneqarsimammat, naak tusarnaariat amerlanersaat qallunaatut paasisinnaanngikkaluartut.

Tamanna Ruth Heilmannip isornartoqarteqaa, pineqartormi Qeqertarsuatsiaarmiunut pingaaruteqarluinnarmat.

Taamaattumik Ruth Heilmannip Naalakkersuisoqatigiit oqaatsitta pisortatigoortuunerannik ataqqinneqqullugit kajumissaarpai tamannalu atorfilittaminnut erseqqissaqqullugu.