Inuiattut ullorsiornitsinni ileqquusoq malillugu kulturikkut nersornaasiisoqarpoq. Inuit marluk nersornaaserneqarput, tassaallutik 63-inik ukiulik Ruth Motzfeldt aamma erinarsoqatigiinni siuttuusartutut ilisimaneqarluartoq Per Rosing.
Kulturimut naalakkersuisoq Tommy Marø nersornaaserneqartoq Ruth Motzfeldt pillugu ilaatigut ima oqarpoq:
- Nunap tunniussinnaasaanik ataqqinnilluni atuisarpoq angalaarnernilu tamatigut nunap tunniussinnaasaanik katersaqartarpoq. Inuunini tamaat assassortuarsimavoq
atorluaalluni. Ineriartortitsineq aalluttarpaa avataanit atortussanik tikisitsinngikkaluarluni
kusanartuliornerlu pingaartitaraa, misigisimagamimi allat piinik akoorinani nammineq pigut
pingaartillugit. Nerisassiornermi, inuuniarnermi kusanartuliaminilu nuna aallerfigisarpaa.
Tommy Marø Per Rosing pillugu ima oqarpoq:
- Ilinniartitsisuunermi saniatigut nipilersornerup tungaatigut sammisarpassuaqarpoq.
Erinarsoqatigiissuit 1991-imi pilersinneqartut aqutsisuuffigisarsimavai pikkorissartittarlugit,
erinarsoqatigiit NIPE, MIK, Aavaat namminerlu erinarsoqatigiit pilersitani
aqutsisuuffigisarsimavai. Nunatsinni aammali nunani avannarlerni erinarsoqatigiit naapittarnerannut peqataasarpoq ilaatigullu
erinarsorluni isiginnaartitsissut “Qasapip ullua kingulleq” piviusunngortinniarneqalermat
aallaqqaataanit suleqataaffigalugu. Kulturimut naalakkersuisoq Tommy Marø nersorniarneqartut pillugit ilaatigut taama oqarpoq.