Ruth Heilmann: Pasilliutit sakkortunerpaamik akerlilerpakka
Qarasaasiakkut taasisitseriaatsimik Inatsisartut eqqunngitsumik atuisimaneragaanerat KNR-ip nittartagaani oqallisigineqaqaaq, ilaatigut ilaasortat kikkut allat sinnerlugit taasisimanerannik tusatsiakkat imaaginnavillutik. Nittartakkakkut oqallinnermi aternik taaguilluni pisuutitsiniarnerit akuerineqarsinnaanngitsut Inatsisartut siulittaasuat Ruth Heilmann tusagassiuutinut allappoq.
novembarip 11-at 2008 05:14
- Pasilliutit taamaattut sakkortunerpaamik akerlilertariaqarpakka. Erseqqissumik ilisimanngilarput maleruagassat unioqqutinneqarsimanersut, taamaattoqarsimassappallu taakkua kia unioqqutissimanerai, Ruth Heilmann tusagassiuutinut nalunaarummini allappoq.
Taassuma erseqqissarpaa, kinaluunniit Inatsisartut Siulittaasoqarfiannut naammagittaalliornissamut periarfissaqarmat, kina maleruagassanik unioqqutitsisimanersoq nalunaarlugu.
Taamaattorli Ruth Heilmann allappoq, “taasisitseriaatsimik akuerisaanngitsumik atuineq pillugu naammagittaalliuutinik Siulittaasoqarfik qanoq ilisukkulluunniit tigusaqarsimanngitsoq”.
