Ruth Heilmann iliuuseqarusunngilaq

Inatsisartunut ilaasortat ikinnerpaamik ataatsip taasissusisarsimaneranut pappialaq uppernarsaat oktobarip 15-anili Inatsisartut siulittaasuata tigoreerpaa.

Novembarillu 19-ani inatsisartut siulittaasuat Ruth Heilmann tusagassiutinut qisuariaateqarpoq ilaatigut pisoq ilisimasaqarfiginagu oqarluni.

Novembarip 26-ani Emilie Olsenip inatsisartunut ilaasortamik allamik peqquserlulluni taasissussisimanera pillugu, Inatsisartut Siulittaasuata Ruth Heilmannip ilisimasaqarsimannginnerminik oqalunnera eqqortuliornerunngitsoq, kingorna paasinarsioq ikinnerpaamik inatsisartuni ilaasortat pingasut taasissussisarsimasut.

Inatsisileritooq misissuitereerlugu inatsisartut siulittaasoqarfiat aalajangerpoq taasissussisimasut taasissunneqartullu suneqassanngitsut.

Ruth Heilmannip siumukkormioqataata Isak Davidsenip nassuerutigereerpaa inatsisartut siulittaasoqarfiat nalililiinerlussimasoq taamaammallu tunuartariaqartoq.

Aamma Siumut inatsisartuni gruppeformandia Otto Jeremiassen piumasaqarpoq Ruth Heilmann inatsisartut siulittaasuattut tunuassasut Inatsisartut ataqqinassusaat innarlermagu.

Kiisalu Ilulissat aqquserngini inuinnarnernik apersuinermi innuttaasut ilaat Niels Karl Olsen ima oqarpoq.

“inatsit ersernerloreermat toorsisimasut isumakkeerfigineqarnerat ippinnartoqartinngilara, tassani pakatsinarnerpaavoq inatsisartut siulittaasuat inuiaqatigiinnut salluliorami.”