Russit umiarsuaasa Savalimmiuni talissinnaanerat killilersorneqalertoq
Russit umiarsuaasa Savalimmiuni talissinnaanerat killilersorneqalerpoq.
Savalimmiuni naalakkersuisut nittartakkaminni taama allapput.
Russit aalisariutaat taamaallaat Ruslandip Savalimmiullu akornanni aalisarsinnaanermut isumaqatigiissummut oqallisaaqisumut atatillugu Savalimmiuni talissinnaassapput.
Russit Savalimmiormiut imartaanni aalisarsimasaat 100.000 tonsit taamaallaat tulaassinnaassavaat.
Savalimmiuni naalakkersuisut siulittaasuata, Aksel V. Johannesenip, tusagassiortunik ullumi sisamanngornermi katersortitsinermi tamanna oqaatigaa. Savalimmiuni nutaarsiassaqartitsivik Kringvarp Føroya taama allattoq, DR aamma allappoq.
Russit aalisakkanik 400.000 tonsinik tulaassisinnaanissaat isumaqatigiissutaareeraluarpoq, maannali taamaallaat 100.000 tonsit tulaanneqarsinnaalissallutik. Aalisakkat 400.000 tonsit Savalimmiut imartaanni nunallu tamalaat imartaanni aalisakkat pineqarput.
Russit umiarsuaat Savalimmiuni umiarsualivinni aamma iluarsartuunneqarsinnaassanngillat. Tamanna tusagassiortunik katersortitsinermi aamma ilisimatitsissutigineqartoq, tusagassiortoq politikkikkullu naliliisartoq Savalimmiormiu Árni Gregersen DR-imut oqarpoq.
Ajornartoortoqassappalli tamanna atuunnavianngilaq.
Savalimmiut Ruslandillu aalisarneq pillugu isumaqatigiissutaat oqalligineqaqisoq sivitsorneqassanersoq, Savalimmiuni naalakkersuisut ukiaru nalilersussavaat.
Savalimmiormiut Barentip imartaani saarullinnik saarulliillu ilaannik kullerinik aalisarsinnaanissaat ilaatigut isumaqatigiissutaavoq. Russit akerlianik Savalimmiut imartaanni ammassassuarnik avaleraasartuunillu aalisarsinnaassapput, pisaallu Savalimmiuni umiarsualivinni tulaanneqarsinnaassallutik.
