Russit umiarsuaanni atukkat tupinnanngillat

Umiarsuarmi inuttaasut kalaallit nerisaluttut, inigisaat eqqiluinngitsut tunisassiorfik eqqiluisaarfiungitsoq, Alexandr Meronenkomi inuttaasimasoq KNR-imut oqaluttuarpoq.  

Kisianni russit kilisaataataasa qanoq ajortigineri inuttaarusuttut ilisimareersimasariaqaraluaraat, sulisartut siuttuat isumaqarpoq.

- Isumaqarpunga ilisimaneqartariaqartoq russit kilisaataataannut ikissagaanni pissutsit qanoq ittuunersut. Kikkut tamarmik nalunngilaat russit kilisaatipalaavi taakkua qanoq ajortigisut. Aamma isumaqarpunga Halibut Greenlandip taanna nalunngikkaa, Jess G. Berthelsen oqarpoq, nangillunilu.

- Russit kilisaataataannut ikissagaanni pissutsit tassa taamaapput. Atortuluttorujussuupput aammalu nutaanngitsorujorujussuullutik.

Aamma atuaruk Halibut Greenlandip avaleraarsartoorniutaani suleruluttut

Taassuma aamma erseqqissarpaa russit avaleraasartoorniutaanni, Alexandr Meronenkomi, inuttaasimasut SIK-mut saaffiginnippata misissuisoqarsinnaasoq.

- Soorunami ilaasortaappata uagutsinnut saaffiginnissapput. Soorunami arlaatigut misissussavarput. Siullermik aamma misissortussaassavarput isumaqatigiissut qanoq ittuusimanersoq aammalu qanoq neriorsorneqarsimanersut.

Kalaallillu kilisaatini inuttaasartut Alexandr Meronenkomisulli ajortigisumik nalaataqartassanngippata, aammalu kalaallit inuiaqatigiit aalisagaatiminnit isertitaqarnissartik qulakkiissappassuk, taava Naalakkersuisut avaleraasartuunik pisassiinissamut agguaariaasertik allanngortittariaqaraat, SIK-p siulittaasua isumaqarpoq.

- Umiarsuaqanngitsunut, angallateqanngitsunut pisassiissutinik tunisisarneq unitsinneqartariaqartoq. Taava taamaasilluni ilaatigut pinngitsoorneqarsinnaavoq taama pisoqaqqinnissaa, Jess G. Berthelsen oqarpoq.

Aamma atuaruk Niugunik aningaasarsiassaqanngillat