Russit tuluillu isumaqatigiikkunnaavipput

Russit Tuluillu akornanni isumaqatiinngittoqalerpoq. Ruslandimit tuluit nunaannut qimaasuusimasoq, Alexander Libvinenko radioaktiivi polonium 210-mik taaneqartartoq atorlugu toqunneqarneranut atatillugu, toquitsisutut pasineqartoq Ruslandimit tuluit nunaannut tunniusserusuttoqanngilaq:

Kilitsissiamik Lidvinenco-mik toqutsisutut pasisaq KGB-mi kilitsissiaasimasoq, Andrei Lucovoi, tuluit nunaannut tunniunneqarnissaanut Russit itigartitsereersullu, Tuluit nunaanni premierministeri Gordon Brown, sapaatip akunnerani tullermi Ruslandimut akinerlorujussuarnissaa ilimagineqartoq, Tuluit aviisii allapput.

Toqutsisimasutut pasisamik Russit tunniusserusunnginnerminnut patsisigaat, Russit innuttaaasuanik Ruslandimiit tuluit nunaannut tunniussisoqassappat, russit tunngaviusumik inatsisaat unioqqutinneqassasoq. Russilli neqeroorutigaat, russeq pineqartoq nammineq nunagisamini eqqartuunneqassasoq, tamannali tuluit nunaata naammaginngilaa.

Isumaqatigiinngittoqaannassappat ilimagineqarpoq, Russit aallartitaat tuluit nunaannit aniatinneqassasut, assinganillu tuluit aallartitaat ruslandimiittut akiniutitut Ruslandimit aniatinneqassasut. Aallartitanik aniatitsineq sorsunnermi nillertumik taaneqartartup nalaani kingullermik pivoq.