Russit sakkutuui tunuarterput
Ruslandip præsidentiata Dmitrij Medvedev-ip akunnialuit matuma siorna Georgiamut sorsugiarneq unitsinneqassasoq peqqusivoq. Russillu sakkutuui ullut arlallit akersuutereersut maanna tunuartertut erseqqissaatigineqarpoq.
Allattoq Louise M. Kleemann
aggustip 12-at 2008 11:22
Sorsukkunnaaqqusinermik peqqussut tamanna pivoq, franskit præsidentiat EU-milu siulittaasoq Nicolas Sarkozy Ruslandip illoqarfiisa pingaarnersaannut Moskvaliarlutik akiuukkunnaarallartoqarnissaannik Medvedev-imut eqqissisaajartoreersullu.
- Taamatut aalajangerninnut pissutaavoq Georgiamiut oqartussaasuisa eqqisseqatiginissaat pisariaqarmat, taama Medvedev russit illersornissamut ministeeriaqarfianeersut ataatsimeeqatigineranni oqarpoq.
Taassuma taama oqarnera sioqqullugu russit nunanut allanut ministeriata Sergej Lavrov-ip russit georgiap præsidentianut tatiginnikkunnaarnerarlugit oqaatigaa.
- Inuk taanna peertariaqarpoq, Georgiamiummi peqatigisinnaajunnaareerpavut uppititsinermilli uagut ileqqoqanngilagut, taama russit siuttuat oqarpoq.
