Russit qalasersuarmut tikiinnaqaat

Qalasersuaq pillugu pilerngunneq aallarteruttorpoq. Maannakkorpiaq russit aqqartartuaraat issittup imartaata itinersaanukarpoq, tasamani soqarnersoq misissuiffigiartorlugu.

Aqqartartuaqqami atortorissaaqisumi inuttaasut russit pingasut sapiiseqalutik issittup imartaanut aqqarput. Taakkua immap naqqani taaqisumi immap naqqata nunavimmut atanera misissorniarpaat. Tassami russit isumaqarput qalasersuarmi immap naqqa Siberiap nunavittaanut atasoq, taamalu isumaqarlutik pisuussutit tasamaniissinnaasut, soorlu uulia, gassi aatsitassallu allat russit pigigaat.

Russit sikunik aserorterutaata misissuinissamut aqqutissiuussisup naalagaata ippassaq oqaatigaa anguniagartik angugitsik.

- Maanna Qalasersuaq anguarput, ajugaanerput siulleq pillugu tamassi pilluaritsi! Oqarpoq.

Ullaaq arfineq pingasunut qiteqquttoq aqqartartuaraq atortorissaaqisoq immap naqqata tungaanut 4 kilometerit sinnerlugit itissusilimmut ingerlaarluni aallarpoq.

Tasamani immap naqqani russit erfalasuat nalunaaqutsiunniarpaat, taamaaliornermikkut russit Qalasersuarmik piginnittuunerat ersersinniarlugu.

Sakkutuut naalagaasa ilaat generalmajor Carsten Møller Dansk Institut for internationale studie-meersoq oqarpoq taamaaliornerat inatsisitigut sunniuteqanngitsoq.

- Takussutissaannaavoq, Carsten Møller oqarpoq.

Taamatulli takussutissiorneq russinut naalakkersuinikkut pingaaruteqaqaaq.

- Ruslandimi massakkut inuiaassutsimik pingaartitsineq ingerlanneqartorujussuuvoq, maannami Rusland makeqqilerpoq, russillu imminnut nunarsuarmioqatiminnullu nunarsuatsinni inuiassuarnut ilaanertik takutikkusuppaat, Carsten Møller oqarpoq.

Tassa russit taamaalillutik Qalasersuarmi pisuussutinut pilerngunnermi peqataapput. Maanna nunarsuarmiunut sunniiniarnermi russit ajugaasuugallartutut oqaatigineqarsinnaapput. Taamaattorli Qalasersuarmik piginnittoorusuttut allat tassaapput Danmark, Canada aamma USA. Taamaattumik Qalasersuup kikkunnit pigineqarnera suli aalajangiiffigineqanngilaq.

Nalunaaquttap akunnerisa arlaqanngitsut matuma siornagut aqqartartuaqqap Qalasersuarmi immap naqqa tikissimagaa nunat tamat nutaarsiassaqartitsivii nalunaarput.