Russit Qalasersualerngusaannermi sorsunnissamut piareersalerput
Ruslandip, Danmarkip, Canadap, Norgep aamma USA-p ministeriisa peqataaffigisaannik Ilulissani maajimi ataatsimiinnermi Qalasersualerngusaatinnginnissaq isumaqatigiissutaagaluarpoq. Qaammalli ataasiunngitsorluunniit qaangitiinnartoq, russit sakkutuui Qalasersualerngusaannermi sorsunnissamut piareersalersut, russit generaliat oqarpoq.
- Naalagaaffittut soqutigisavut illersorniarlugit periusissanik Illersornissamut Ministereqarfimmi Moskvamiittumi misileraalerpugut, taama iliorpugut nunat allat Qalasersuarmik piginnittuunerminnik nittartaassiinnarmata, Sjamanov erseqqissaavoq.
Ilulissani ataatsimiinnermi maaji naalersoq pisumi Danmarkimi nunanut allanut ministeri peqataavoq, taamanilu Per Stig Møller erseqqissaavoq, Qalasersuaq pillugu sorsuttoqanngilluinnassasoq, ilisimatuussutsikkut pinngippat. Qalasersuarmik piginnittuuneq Naalagaaffiit Peqatigiit nunarsuarmi nunaviit qanoq imminnut atanerat pillugu ataatsimiittartoqatigiivisa ukiut arlallit qaangiuppata aatsaat qulaajarsinnaagaa aalajangiiffigalugulu taamani aamma oqaatigineqarpoq, soorluttaaq Qalasersuup nunamut sumulluunniit atannginnera erseqqissaatigineqartoq.
Russit Qalasersualerngusaateqqilarnerannut pissutaavoq, USA-p qanittukkut ullunik aqqaneq-marlunnik sivisussusilimmik, Alaskap sineriaata avannarpasissuani sakkutuuminnik sungiusartitsinerat. USA-p sakkutuut 5.000-it, timmisartut sorsuutit 120-it umiarsuillu sorsuutit arlallit sungisartippai.
- USA-p sungiusartitsinerata takutiinnarpaa, USA Issittup Imartaani sorsunnissamut maanna piareersartoq, russet generaliat oqarpoq.
Ruslandi Qalasersuarmi immap naqqani erfalasuminnik siorna ivertitsivoq. Taamanikkut erseqqissaatigaat Qalasersuup Ruslandip nunavittaanut atanera ilisimatuussutsikkut paasineqareersoq, tamannali ilumoornersoq Naalaaffiit Peqatigiit suli nalunaarutiginngilaat.
Qalasersuaq eqqaalu uuliamik gassimillu pisuussuteqartorujussuusoq, allaallu nunarsuatsinni gassimik uuliamillu pisuussutit 25 procentii tamaani nassaassaassasut ilimagineqarluni.
Pinngortitamik illersuiniaqatigiit ikummatissanik ujarlernissamut qalluinissamulluunniit maanna mianersoqqusilerput, oqarlutik Issittup imartaa mingutsinneqassagaluarpat avatangiisini ajunaarnersuarmik kinguneqartitsisinnaasoq.
