Russit Putin pisuusorinngilaat
Ruslandiliassaagut, tassani kikkut tamarmik, præsident Vladimir Putin siuttoralugu KGB-mi kilitsissiaasimasup, Alexander Litvinenko-p toqunartumeerneqarneranut toquneranullu atatillugu akuusimanerarneqarnerminnik eqqunnginneraapput.
Aamma russit oqaaseqartartuisa amerlanerit isumaqatigiissutigaat toqutsineq Russit naalakkersuisuisa iluaqutiginiarsimanngikkaat.
Maanna Ruslandimi kikkut toqutsinermut tunuliaqutaasimasinnaanerannik eqqoriaanerit takkussuutileruttorput.
Ruslandimi aviisit ilaat ullumikkut allaaserisaqarpoq, toqutsineq Putin-ip præsidentiuinnarnissaanik kissaateqartunit suliaasimanerarlugu.
Inuit taamatut kissaateqartut tassaapput Putinip naalakkersuisooqatai, Putinip nalaani pissaaneqalersimasut, 2008-milu Putin præsidentiujunnaarpat qanoq iliornissaminnik nalornissuteqartut. Taakkua kissaatigaat Putin 2008-p kingorna præsidentiuinnassasoq.
Piffissat qinigaaffiit marluk kingornatigut Putin 2008-mi præsidentimut qinigassanngortissinnaanngilaq.
- Taamaaliorsinnaanngilanga, inatsisit tunngaviusut naapertorlugit piffissat qinigaaffiit pingajuannut qinigassanngortissinnaanngilanga, Putin oqartarpoq.
Putinip præsidentiuinnarnissaanik kissaateqartut tupinnaraluartumik kissaatigaat Ruslandimi pissutsit ajorsiartuinnavissasut, taamaalilluni Putin allatut ajornartumik qinigassanngorteqqittariaqalerniassammat.
Putin suleqatiminut allanut naleqqiulluni aningaasanik soqutigisaqanngilaq, nunaminik asannilluartuugami pingaartitsisuullunilu.
Præsidentiuinnarnissaanik soqutiginnittut isumaqarput Rusland uivernersuup qeqqaniippat, taava Putin allatut ajornartumik 2008-mi præsidentimut qinigassanngorteqqitariaqalissasoq. Immaqa tamanna Tuluit Nunaanni paasiuminaatsumik toqutsinermut nassuiaataasinnaasut ilagaat.
