Russeq toqunartutortinneqarsimasoq

Ruslandimiu siornatigut KGB-mi kilitsissiaasimasoq ulluni makkunani Tuluit napparsimavianni inuunini annaanniarlugu ilungersuleruttorpoq.

Aatsitassamik qaqutigoortumik tallium-imik toqunartutortinneqarsimanissaa ilimatsaanneqarpoq.

Toqoriarneqarsimagaluarnera paasineqarpat, tamanna Ruslandip Tuluit Nunaatalu akornanni naalakkersuinikkut ajornartorsiulernermik kinguneqarsinnaavoq.

Nakorsat isumaqarput 44-nik ukiulik, Aleksander Litvinenko KGB-mi sakkutuut qullersat ilagisimasaata toqunartumeerneqarnermi anigornissaanut 50 procentimik periarfissaqartoq. Ikinngutaasa toqunissaa annilaanngatigaat.

- Alexanderip isikkua nallinnaqaaq. Nujaarunnikuuvoq utoqqarujussuartullu isikkoqarluni, ikinngutaasa ilaat nutaarsiassaqartitsivimmut BBC-mut oqarpoq.

Tuluit politiivisa aamma Skotland Yardip qanorpiaq pisoqarsimanera misissuleruttorpaat.

Alexander Litvinenko 2001-imi Ruslandimit Tuluit Nunaannut qimaavoq Putin-imullu isornartorsiuisartutut ilisimaneqarluni.

Ruslandimiup allap aviisiliortup, Putinimik isornartorsiuisartup, oktobarimi toqutaanera misissuiffigileruttorlugu Alexander Litvinenko tassanngaannartumik eqqumiitsumillu napparsimalerpoq.

Alexander Londonimi novembarip aallaqqaataani neriartoqateqareerluni napparsimalerpoq.

Nakorsat oqaatigaat tallium-imik toqunartutortinneqarsimassasoq. Taanna ima toqunartigaaq allaat grammip ataatsip angut inersimasoq toqussinnaallugu.

Siusinnerusukkut Putin-imut akerlilersuisut tallium-imik imaluunniit dioxin-imik toqunartutortillugit toqunneqartarput.

Ilisimaneqarnerit ilagaat Ukrainep præsidentia, Putinimut illersuisoq unammillugu qineqqusaartilluni napparsimalersoq.

Aviisi The Times naapertorlugu Tuluit atorfilittaat oqarsimanerarneqarput toqunartumeereriartoqarsimasoq paasineqarpat, Russit Tuluillu naalakkersuisuisa akornanni ajornartorsiortoqalissasoq.

Russit qullersaasa ilaannit oqaatigineqarpoq toqunartumeereriarnermut attuumassuteqanngilluinnarlutik.