Russeq nukittooq Sisimiulialerpoq
Ilya Chernousov Oslomi VM-qarnerani bronzennalluni nuannaartoq. Maanna Sisimiunut tikissamaalerpoq. >
Qaaqqusat tusaamasat saqqummersitsinerlu Arctic Circle Race ingerlanneqalerpat ukiormanna ingerlanneqassapput.
- Qaaqqusagut tassaapput ujakkaartartoq inuusuttoq Ruslandimeersoq Ilya Chernousov, Oslo-mi VM-ertoqarnerani bronzennattoq kiisalu Reto Burgermeister Schweizimi ukiorpassuarni ujakkaallaqqinnerpaasarsimasoq, Arctic Circle Racemi siulersuisut siulittaasuat Jens Klaus Lennert ilisimatitsivoq.
Qaaqqusat saniatigut Kulturikkut illorsuaq Taseralik assinik ukiut ingerlaneranni assilisanik saqqummersitsiniarpoq.
Jens Klaus Lennertittaaq oqaatigaa ukiormanna peqataasussat 110-usut, ukioq kingulleq 100-simallutik.
Peqataasussat amerleriarneranut pissutaanerpaavoq pilersaarusiortut ujakkaarnissaq pillugu pilerisaarutinik nunarsuaq tamakkerlugu nassiussuisimanerat.
- Nunarsuaq kaajallallugu kanaalit 138-t pilerisaaruterput aallakaatissimavaat, tamannalu peqataasut amerlanerunerannut pissutaavoq, Jens Klaus Lennert oqarpoq.
Qallunaat timersornermik tusagassiisartut arlallit najuutissapput, taamaasillunilu nunani tamalaani kanaalit 240-nik amerlassusillit unamminermit ilanngutassiissapput.
Arctic Circle Race Sisimiuni ingerlanneqartartoq 160 km-inik isorartussuseqarpoq ullunilu pingasuni ingerlanneqartarluni. Taamaattumillu nunarsuarmi sisoraatinik oqilaniunnermi sakkortunerpaatut taaneqartarpoq. Isumannaallisaanikkut upalungaarsimaneq ukiut 15-it ingerlanerani pitsanngoriartuinnarsimavoq.
- Piumassutsiminnik ikiuuttut 150-it, annaassiniarnermut pilersaarut ukiut tamaasa nutarterneqartartoq kiisalu politiit qatserisartut napparsimmavillu piareersimasutut ikiortigalugit isumannaallisaaneq illersorneqarsinnaasarpoq. Ukiormannali ujakkaartut ingerlaarfissaannik GPS-nillu ikiuuttut pilersussamaarpagut, Jens Klaus Lennert naggasiivoq.
Aappariit Slettemarkikkut kiisalu siorna arnani ajugaasoq
Niviaq Chemnitz Berthelsen apriilip 8-ani 2011 unammeqataaqqissallutik nalunaarsimapput.
