Ruslandip USA-mik oqaloqateqarnini ingerlatiinnarniaraa

Ruslandip nunanut allanut tunngasunut ministeria, Sergei Lavrov, USA-p nunanut allanut tunngasunut ministerianik Rex Tillersonimik ataatsimeeqateqareerluni taama oqarpoq.

- Amerikami suleqatigut peqatigalugit oqaloqatigiinnerit nanginnissaannut piareersimasoraagut. Aamma allanik qinigassaqarsorinngilagut, Lavrov oqarpoq.

Kangiamiut Filippinerini illoqarfiit pingaarnersaanni, Manilami, ataatsimeersuarneranni Lavrov Tillersonilu naapipput sivisuumillu ataatsimiillutik.

Killilersuinerit pillugit apeqqutit tusaanngisuusaarai

USA-p Ruslandillu akornanni pissutsit piffissami kingullermi ajornerulerput, amerikamiullu naapertorlugit sorsunnerup nillertup nalaanili aatsaat taama ajortigalutik.

Nunat nunap aappaanit aallartitanik peersitsipput, amerikamiullu præsidentiat, Donald Trump Ruslandimut pillaatitut iliuusissanik ullut arlaqanngitsut matuma siorna akuersissuteqarpoq.

Tillersonip Lavrovillu ataatsimiinneq aallartimmat tusagassiortunik assilitinnissartik akueraat, pillaatitulli iliuutsit nutaat nunat marluk akornanni pissutsinut qanoq sunniuteqassanersut aperineqaramik akinngillat.

Amerikamiulli pillaatitut iliuusaat akineqartariaqartut, russit nunanut allanut ministereqarfiannit oqaaseqaateqartoqartoq, russit nutaarsiassaqartitsiviata, Tassip allaaseraa.

- Siunissami taamaassaaq. Washingtonili aporaanniarpaluttumik pissuseqarunnaarpat oqaloqatigiinnerit pisarnertut ilitinnissaannut piareersimavugut, ministereqarfimmit oqarput.

    /ritzau/Reuters