Ruslandip Ukrainermik saassussinera NATO-p assuaraa: Ukraine tapersersorparput

Nunat killiit illersoqatigiiffiata NATO-p, Ruslandip Ukrainemik saassussinera assuaraa. Ruslandip saassussinera illersorneqarsinnaananilu pisariaqanngitsoq NATo-p oqaatigaa.

NATO-p qullersaa Jens Stoltenberg taama nalunaaruteqarpoq.

- Ukrainemiut piffissami matumani misiginneqatigaavut tapersersorlugillu. NATO-p iligisat sutigut tamatigut illersussavai, oqarpoq.

AAMMA ATUARUK Ruslandip Ukraine sumiiffinnit assigiinngitsunit saassuppaa

Nunat NATO-mi ilaasortat 30-t ataatsimiikkasuarnissamut aggersarneqartut NATO-p atorfilittaasa ilaata oqaatigaa. Sisamanngornermi kingusinnerusukkut ataatsimiittoqassaaq.

NATO Ukrainep Ruslandillu akornanni aaqqiagiinngissuteqartoqarnerani pingaarutilittut inissisimavoq.

Ukrainemmi NATO-mi ilaasortaalinnginnissaa NATO-p neriorsuutigissagaa Ruslandip piumasaraa. Ukrainemi NATO-mi ilaasortaalissagaluarpat tamanna Ruslandip isumannaatsuunissaanik innarliissasoq russit oqaatigaat.

NATO-li neriorsuinianngilaq, neriorsuisinnaannginnerarlunilu.

Illersornissaqarfiup atortulersuutai russit raketiinit eqqorneqartut

Rusland Ukrainemik unnuaq saassussilerpoq.

Ukrainemiut illersornissaqarfiata atortulersuutai timmisartoqarfiilu raketinik eqqorneqartunut ilaapput. Ukrainemi oqartussat tusagassiorfiillu assigiinngitsut taama nalunaaruteqarput.

- Naak arlaleriarluni mianersoqqussuteqartoqareeraluartoq, atorfilittallu aqqutigalugit aaqqiisoqarnissaanik siunniussisoqaraluartoq - Ruslandip nunamik namminersortumik attaviitsumillu saassussinissaq aalajangeqqippaa, Jens Stoltenberg oqarpoq.

- Naalagaaffiit innuttanut pisussaaffiinik unioqqutitsineruvoq, Europallu USA-llu isumannaallisaanikkut suleqatigiinnerannik aamma innarliisinnaalluni. Ruslandip saassussinini ingerlaannartumik unitsissagai kaammattuutigissavara, Jens Stoltenberg oqarpoq.

NATO Ukrainemi sakkutuuliinavianngitsoq taassuma siusinnerukkut oqaatigereerpaa.

USA-p Ukrainemi sakkutuuliinissani aamma pilersaarutiginngikkaa USA-p siusinnerukkut aamma nalunaarutigereerpaa.

Ruslandip Ukrainemik saassussinera EU-mit aamma assuarineqarpoq.

Rusland Ukrainemik naakkittaatsumik saassussivoq. EU-llu oqaluttuarisaanerani immikkut ittumik sukannersumillu aatsaat taama sakkortutigisumik kinguneqartitsisoqarumaarpoq.

EU-Kommissionip siulittaasua Ursula von der Leyen, EU-llu nunanut allanut tunngasunut qullersaa Josep Borrell taama oqarput:

- EU-mit aatsaat taama sukannertigisumik iliuuseqartoqassaaq, EU-p nunanut allanut tunngasunut qullersaa Josep Borrell oqarpoq.