Ruslandip timmisartuutai Canadamit apeqquserneqarput

Russit timmisartuisa Canadap killeqarfianut qanittumi sungiusartarneri pillugit Canadami nunanut allanut ministerip, Lawrence Cannon-ip, sukumiinerusumik paasissutissiisoqartarnissaa piumasaraa.

Timmisartut Ruslandimeersut Canadap sineriaani issittumilu sooq taama angalasartiginersut maanna paaserunneqalerpoq, aningaasarpassuimmi atorneqartarunarmata. Issittoq pillugu Canadami oqartussaasut aamma maanna oqartalerput, apeqqutit taakkorpiaat Norgimiit apeqquserneqartalersut, sorsunneq nillertumik taaneqartartoq atuukkallarmat umiarsuarnik timmisartunillu Ruslandimeersunik taamanikkut tamaani angallanneq annertoqisoq ingerlanneqartoq utersaarsorineqalermat.

Canadami nunanut allanut ministeri, Lawrence Cannon, Ruslandimilu nunanut alalnut ministeri, Sergey Lavrov, qanittumi ataatsimiipput, Cannonillu taamani piumasaraa, Ruslandimiit timmisartut susarneri tamarmik paasissutissiissutigineqartassasut, sapinngisamik aallanginnerini tamanna pisassalluni. Ruslandimi nunanut allanut ministeri ingerlaannaq akivoq, sakkutuut issittumi sungiusartarnissaat allatut ajornartumik ingerlanneqartuartariaqartoq. Ilutigalugulu nassuiarpaa, uuliap akia pissutigalugu Rusland taamaaliortuartariaqassasoq.

Canadali ernumajuarpoq, nunanullu allanut ministeri, Lawrence Cannon, oqarpoq, Rusland qinngasaarisutullusooq taama pissusilersussanngitsoq.