Ruslandip saassusisarnini nangeqqippai
"Georgiap nalunaarutigisimatsiaannaraa illoqarfik Gori, illoqarfiit pingaarnersaat Tbilisimit 60 kilometerit missaannik ungasissutilik russit tigusarigaat, tamanna Ruslandip tusagassiuutitigut ilumuunnginnerarpaa", taama Politiken unnummut allappoq.
Naak russit misiaraluartut tusagassiorfinnit nalunaarutit amerlanerpaat ersersippaat Ruslandip Georgiami sakkutooqarnikkut iliuuseqarnini ingerlatiinnarai. Tamanna tunngavigalugu Georgiami sillimaniarnikkut sakkutuut ullaap tungaani Reutersimut oqaatigaat Georgiap sakkutuuni nuutikkai, taamalu illoqarfiit pingaarnersaat Tbilisi illersorniarlugu piareersimatilerlugit.
EU-kommissionimit naalakkersuisutigoortumik iliuuseqarneq tassaasimavoq Ruslandip erniinnarluinnaq Georgiap nunataani sakkutooqarnikkut iliuuseqarneranik unitsitsinissaanik qinnuigissallugu, taama arnaq EU-kommissionimit oqaaseqartartuusoq ullumi oqarpoq.
Russit præsidentiat Dmitrij Medvedev nutaarsiassaqartitsivimmut Interfaximut ullaap tungaa oqarpoq Ruslandip Georgiami sakkutooqarnikkut illersuiniarnini unitsinnialeraa, tamaanilu russit sakkutuuisa Ossetiap kujataani illoqarfiup pingaarnersaasup aaqqiagiinngiffiusullu Tshinvalip sakkutooqarnikkut nakkutigineqarnera pilersillugu.
Russit præsidentiannit oqaaseqaammut tassunga ilanngullugu Reutersimit tusagassiortup Ossetiap kujataata avannaani Ruslandip ilaanit ullumi nalunaarutigaa sakkutuut tuusintilikkuutaartut qamussuillu sorsuutit 20-kkuutaartut rakettinillu igeriussisarfiit Ossetiamut kujallermut ingerlaartut.
