Ruslandip Naalagaaffiit Peqatigiit pisortaata tikeraarnerani Kyivimut saassussinertik uppernarsaraa

Ruslandip Nalaagaaffiit Peqatigiit pisortaata, António Guterresip Ukrainemi illoqarfiit pingaarnersaannut Kyivimut tikeraarnerani silaannakkut saassussisimanini tallimanngornermi uppernarsarpaa.

Russit illersornissamut ministereqarfiata oqarnera naapertorlugu ukrainemi avataarsualiartartoqatigiit suliffeqarfiannut Artyomimut aserorterissutaasumik sisamanngornermi unnukkut rakettinik sassissisoqarpoq.

Saassussisoqarnerani inummik ataatsimik toqutaasoqartoq Ukrainep naalakkersuisuisa paasissutissiissutigaat. Sapaatit akunnerisa marlungajaat ingerlanerani saassussinerni taanna siulliuvoq. Reuters naapertorlugu saassussisoqarnerani inuit qulit ikilerneqarput.

- António Guterres pisortatigoortumik tikeraarnerani Kyivimi illoqarfiup qeqqanut missilimik saassussineq. Ulloq ataaseq sioqqullugu Kremlimi nerrivimmi takisuumiippoq, ullumikkullu qaartartut qulaani qaararput, Ukrainep præsidentiata siunnersortaa, Mykhailo Podoljak Twitterikkut allapoq.

- Moskvamit allagaq?, Podoljak allappoq.

Nalaagaaffiit Peqatigiit pisortaat annilaartoq

Guterres sorsunneq pillugu ilaatigut præsident Volodymyr Zelenskyj oqalliseqatigiartorlugu Kyivimiippoq. Taanna marlunngornermi Moskvamiippoq. Tassanilu russit præsidentiat, Vladimir Putin ataatsimeeqatigalugu.

Guterresip Kyivimi qaartartumeerinerit annilaassutigalugit tuluit tv-qarfiannut BBC-mut oqaatigaa.

António Guterresip tikeraarnermini Zelenskyj Ukrainep kujataata kangisissortaani illoqarfimmi umiarsualiviusumi Mariupolimi russit sakkutuuisa ungalusimasaat pillugu eqqartueqatigaa.

Ukrainemiut sakkutuui inuinnaallu Mariupolimi sisaliorfimmi Azovstalimi mattusimapput, inuinnaallu tassannga qimagussortinniarnerat arlaleriarlugu iluatsinngitsoorneqarpoq. Inuinnaat sisaliorfimmit tallimanngornermi qimagussortinneqaraluaqqissasut ukrainemiut naalakkersuisuisa oqaatigaat.

- Illuatungeriit tamarmik ajunngitsuliornissaat pisariaqartipparput, ataatsimullu taamaaliorpugut, Naalagaaffiit Peqatigiit ajornartoornermi ataqatigiissaarisuat, Amin Awad qimagussuisoqarnissaanut pilersaarutit pillugit Reuterimut oqarpoq.

Guterresip Zelenskyjip sisamanngornermi unnukkut ataatsimeeqatiginerani Naalagaaffiit Peqatigiit qimagussuinissamut sapinngisani tamaat iliuuseqartoq oqaatigaa.

Zelenskyjip Naalagaaffiit Peqatigiit pisortaata ilungersornera upperalugu oqaatigaa.