Ruslandip Issittumi sakkortooqarnikkut annertusaanissaa Samuelsenip mianersoqqussutigigaa
Danmarkimi tusagassiorfiit arlallit taama allaaserisaqarput. Danskit nunanut allanut tunngasunut ministeriat Anders Samuelsen, Issittoq pillugu ataatsimeersuarnermi Ruslandip avannaani illoqarfimmi Arkhangelskimi ingerlanneqartumi pingasunngormat oqalugiartup siulliup tulleraa.
Issittullu eqqisseqatigiiffiujuaannarnissaa Samuelsenip tassani erseqqissaatigaa.
- Aap, Issittumi sakkutooqarnikkut annertunerusumik najuuttoqarpoq. Aamma Danmarkip sakkutooqarnikkut najuunnini annertusivaa, minnerunngitsumik ujaasinermik annaassiniarnermillu suliassat annertuut kiisalu avatangiisinik nakkutilliineq eqqarsaatigalugit, nunanut allanut tunngasunut ministeri oqarpoq nangillunilu:
- Iliuutsit akerleriinnertut aporaannertullu isigineqarsinnaasut suulluunniit pinngitsoortinnissaat naalagaaffinnit tamanit anguniarneqartariaqarpoq.
AAMMA ATUARUK Udenrigsminister skal diskutere Arktis med Rusland
Rusland ukiuni kingullerni qulini Issittumi amerlanerusunik sakkutuuliisimavoq. Taamatullu annertusaaneq nunani killerni ernumanartoqartinneqarpoq.
Samuelsenip taamatut oqariartuuteqarnera russit politikeriinit oqaaseqarfigineqanngilaq. USA-lli Moskvami aallartitaa, John Tefft, russit nutaarsiassaqartitsiviannut Ria Novostimut ima oqarpoq:
- Danskit nunanut allanut tunngasunut ministeriata oqaatigisai soorunami tusarnaaqqissaarpakka. Tassungalu atatillugu USA-p neriuutigaa Issittoq ullumikkutut atorneqaannassasoq, tassalu: Nunarsuup immikkoortua suleqatigiinnermut piviusumut atorneqartoq.
