Ruslandimit puisit amiinik piserusuttoqalerpoq
Ruslandimit puisit amiinik piserusuttunit sisamanit imminnut attuumassuteqanngitsunit saaffigineqaqqammerpugut. Aalajangersimasunik piumasaqanngikkuartut saaffiginninnerat qaammaallaataavoq, Michael Nielsen, Nunatta Ammeriviata avammut tuniniaasartua oqarpoq.
Michael Nielsen namminersortunit pigineqartumi Nordic Atlantic Fur Groupimi pisortaavoq.
Puisit amiinik tuniniaaneq unittuujusavissimammat ammit Great Greenlandimi uninngasuutit 200.000-inngorsimapput. Naallu ammerivik 8 millioni koruuninik Naalakkersuisut tapiiffigigaluaraat, sulisut 69-iniit 41-nngorlugit ikilisartariaqarsimapput, isumalluartoqarporli.
- Takuneqarsinnaalerunarpoq puisit amiinik tuniniaanerup ingerlarsoqqilernissaa, Michael Nielsen oqarpoq.
- Nunat Ruslanditut Ukrainetullu ittut nunanit EU-miittunit tuniniaavigissallugit pissarsinarnipilussuupput. Nunarsuaq tamakkerlugu aningaasatigut ajornartorsiorneq qaangiuteriarpat nunat taakku aningaasatigut siuariartorfiunerpaassapput, naggasiivoq.
