Ruslandimi ikuallannerit 85 milliardinik naleqarunarput
Illoqarfeeqqami illut nungullutik ikuallassimasut sanaqqillugit aallartinneqarput. Naalakkersuisut siulittaasuata Putinip eqqorneqartut tamarmik illuisa nappaqqinneqarnissaanik neriorsuinera tunngavigalugu tamanna pivoq. Tamannalu pillugu aamma teknikerit assiliissutinik alapernaarsuutinik ikkussuillutik aamma aallartipput. Assiliissutit Putinip atorfilittanut tatiginninngitsup peqqussuteqarneratigut sumiiffinni assigiinngitsuni ikkussorneqarput. Atorfilittat illuliunnginnissaat assiliissutit akornusersimaassavaat.
Illoqarfeerarpassuarni 100-likkuutaani illut napparneqassapput, taakkualu akiligassarparujussuit immikkoortortaasa ilagissallugit. Russit aviisiat tutsuiviginartoq Commersant isumaqarpoq aningaasartuutit 85 milliard kr.-inik naleqassasut. Ruslandimi naalakkersuisut ajoqusikkanik naliliinerat suli amigaataavoq. Commersantip kisitsisaataani russit karrinik katersugassaat ikuallannernut aamma pissutaaqataasut ilaanngillat. Assersuutigalugu qajuusiassat katersukkat nalinginnaasumik katersorneqartartut pingajorarterutaat inorpaat, tamannalu russit aviisiata allaaserisaa malillugu aningaasat naleeruterujussuarnerannik kinguneqassalluni taamalu aningaasarsiornerup ineriartorneranut akimmisaartitsisuussalluni.
Ruslandimi politikkikkut aqutsisut marluk aammattaaq ikuallannernit ajoquserneqarput. Naak Vladimir Putinip piffissami kingullermi illoqarfeeqqat ikuallattut angalaqattaarfigisimagaluarai taassuma kiisalu præsident Medvedevip nuannarineqarnerat annikillisimavoq. Misissueqqissaartartup oqarnera naapertorlugu taakkua ikuallattoornissamut sillimmasimanngitsutut ipput.
