Rusland sallerpaanut ilaarusuppoq

Ruslandip silap pissusaanut tunngatillugu anguniakkani sakkortusiniarai aamma gassimik silaannarmik kissakkiartortitsisumik mingutsitsinini 1990-imut naleqqiullugu 2020-mi 20-25 procentimik appariartinniaraa, nunat siuttuisa Stockholmimi ullumi immikkut ittumik ataatsimiinneranni, Ruslandip præsidentiata Dmitrij Medvedevip nalunaarutigaa.

Præsident Medvedevip erseqqissarpaa, Rusland taamaalilluni nunani silap pissusaanut tunngatillugu iliuuseqarniartuni sallerpaanut ilannguttoq.

- Maanna nunat allat pimoorussinerunissamik upperinninnerulernissaannik paasitinniarnissaat siunnerfigilerparput, Medvedev tusagassiortunik katersortitsinermi oqarpoq.

Russit silap pissusaanut taamatut annerusumik iliuuseqarnialernerminni, EU-p silap pissusaanut iliuusissamisut siunniussaanut naleqqersuussinnaanngorput.

Russit taamatut silap pissusaanut iliuuseqarniarlutik neriorsuuteqarnerat, EU-Kommissionip siulittaasuata José Manuel Barrosop nuannaarutigeqaa, oqarlunilu tamanna silap pissusaa pillugu Københavnimi ataatsimeersuarnissaq sioqqullugu alloriarnerusoq pingaarutilerujussuaq.