Rusland isumannaallisaanermut tunngasunik sukateriniarpoq
Aviisimi The Barents Observerimi allaaserisaq naapertorlugu isumannaallisaaniarnerit pillugit Rusland maanna aamma iliuuseqalersaarpoq. Aporfeqarporli.
Inatsisissatummi siunnersuutit Ruslandimi inatsisartuni Dumami saqqummiunneqartut naapertorlugit avatangiisinik illersuiniaqatigiit piumasaqaataat uuliasiortitseqatigiillu piumasaqaataat naapeqatigiissinniarneqarsimapput.
Siunnersuutit akuersissutigineqassappata inatsisit USA-mi atuutsinneqartut assigilissavaat. Ruslandimili pisuussutit pinngortitameersut pillugit ministereqarfik siunnersuuteqarpoq, Dumami siunnersuutinik sukannerpallaarunnaarsitsisinnaasunik. Isornartorsiuisut taama naliliipput.
Uuliasiortitseqatigiiffiit aningaasanik qularnaveeqqusiisarnissaannut piumasaqaateqarfigineqartarnerat sukannerpallaarunnaarsinniarneqartoq isornartorsiuisunit ilaatigut oqaatigineqarpoq, assersuutigalugu uuliamik maqisoortoqassagaluarpat qularnaveeqqusiinermi inatsisissatut siunnersuutit sukannerpallaarunnaarsinnaanissaat aarleqqutigineqarluni.
Taamaakkaluartoq russit oqartussaasui inatsisinik sukaterinissamut suli periarfissaqarput, issittup imartaani isumannaallisaaniarnerit pitsanngorsaavigineqarnissaat suli periarfissaalluni.
Russit issittup imartaani misiliillutik qillerinissaat aappaagu aatsaat aallartinneqassapput.